KRALENDIJK.- Awe e akta di entrega entre e curator di BOPEC, sr. Mr. C.M. van Liere i sr. Dr. Yamil Lasten, direktor di Curoil Bonaire, a keda firmá. Ku esaki e atkisishon ta ofisialmente un echo i e fasilidatnan di BOPEC a keda traspasá pa Curoil Bonaire.
Ku e atkisishon aki un pilar importante di e sektor industrial i pa e ekonomia di Boneiru a keda mantené. Ademas e atkisishon aki a keda realisá manteniendo kuponan di trabou, kual ta importante pa e desaroyo sosioekonómiko di e isla. Banda di esaki a funda un ‘saneringsstichting’ ku lo pèrkurá pa un proseso seif i efisiente di ‘bodemsanering’. Di e forma aki desaroyo di e área por keda hasí di un manera responsabel.
Ku e atkisishon aki Curoil Bonaire ta fortalesé su posishon den region dor di modernisá i tambe hasi su fasilidatnan mas sostenibel. Di e manera aki Curoil Boneiru ta keda un partner konfiabel pa almasenahe i distribushon di energia. E atkisishon di e fasilidatnan di BOPEC ta kuadra den e strategia di Curoil Bonaire pa fortalesé e sektor di energia na Boneiru i pa krese riba tereno internashonal.
Na sèptèmber 2024, Curoil Bonaire a keda apuntá komo “preferred bidder” pa kompra di e fasilidatnan. Despues di un periodo largu di “due dillegence” i negosiashon, e firmamentu aki ta marka un logro importante pa tantu Curoil Bonaire komo e komunidat Boneriano. E realisashon di e logro aki ta danki na e kolaborashon konstruktivo i estrecho entre Curoil Bonaire, e curator, Openbaar Lichaam Bonaire (OLB) i tur sobrá instansianan Boneriano i Hulandes manera ILT i Rijkswaterstaat.
Durante e simannan benidero e enfoke ta riba e preparashonnan pa renovashon i pa modernisá e fasilidatnan. Ademas, e empleadonan lo kuminsá ku un trayekto di introdukshon i training.
E momento históriko aki lo keda selebrá ofisialmente dia 24 di novèmber próksimo durante un seremonia di traspaso pa kual stakeholders i prensa lo keda invitá. Durante e evento aki Curoil Bonaire lo presentá i elaborá riba e plannan di e terminal.