WILLEMSTAD.- E tradishonal Show Musikal di Pasku di Curoil kaminda ta sende lus pa e temporada di fin di aña, ta hala atenshon di henter komunidat. I e aña aki, ta ku sumo plaser Curoil ta trese atrobe un show di taya pa asina gradisí pueblo di Kòrsou pa e sosten risibí durante aña 2017.
E aña aki, Curoil a buska un elenko nobo di artistanan di taya i p’esei Curoil ta invitá  pueblo di Kòrsou kompletu pa bin selebrá i pasa un anochi agradabel huntu ku Curoil.
E anochi di show musikal di Curoil, kaminda dekorashon di Pasku i lusnan bunita lo iluminá e edifisio di Curoil, lo trese i krea un ambiente festivo pa chikí i grandi i lo tin presentashon pa tur generashon. Entrante 6’or di atardi lo kuminsá ku presentashon di e muchanan di BC Production Foundation, despues e programa ta kontinuá ku koro Moment of Praise. Un show bunita, kolorido i festivo a keda hinká den otro ku algun di Kòrsou su mihó artistanan kual ta: Junior Tecla, Evita Ross, Tamara Nivillac, Hunneley Felicia, Richi Rich, Edsel Juliet i un artista sorpresa. Tur e artistanan aki lo keda kompañá pa e All Star Band bou di direkshon di Hershel Rosario.
Pues djadumingu 3 di desèmber próksimo pa 6’or di atardi, Curoil ta warda un i tur na su edifisio prinsipal na Skalo, pa disfrutá di un show espektakular, bunita i inspirativo komo muestra di apresio i gradesimentu di Curoil na pueblo di Kòrsou.