WILLEMSTAD.- Despues hopi antisipashon Curteez ta lansa e produkshon kontagioso titulá ‘Fly’. E ‘club banger’ aki ta un kolaborashon ku kantante SENZ, ku tambe ta firma huntu ku Curteez riba e imprenta di BuzzBin Productions.
Curteez a kuminsá traha riba e kantika aki dos aña pasá pero a warda te ora el a haña e vokalista korekto pa kompletá e produkshon. Curteez ta splika kon el a buska un persona ku e estilo, aktitut i bos korekto, i a enkontrá esei den SENZ.
Den ‘Fly’, nan keda ilustrá kon un hòmber ta dispuesto di hasi tur kos pa su dama, asta gaña. “Nos ke hasi e dama konsiente ku hòmber ta dispuesto di bula òf ‘fly for di body’, Curteez a kontinuá. Curteez a haña su inspirashon komo DJ, skuchando e remix di Dance ku e tabata tende na radio i tabata determiná pa hasié aun mas mihó. El a a haña su promé oportunidat serka DJ Boogieman, e famoso DJ kurasoleño, unda el a kuminsá toka den e diskotèk i bich club nan di mas grandi di Kòrsou. Na kuminsamentu di su karera, Curteez tabata remix hitnan pa Laser 101, un di e radionan mas popular di nos isla.
Nasé komo Curt Alberg na Kòrsou, Curteez a muda pa Ulanda na 1995 pa kontinuá su estudio. Alberg ta bini fo’i un famia musikal ku tabata militá den diferente banda komo músiko i kantante. Fo’i un edat hóben e tabata sa ku músika tabata su yamada, apesar di a bai Ulanda pa primeramente drenta Forsa Aéreo ulandes, pero despues ku esaki no a logra, el a kuminsá traha pa ING Bank, pa kua e ta laborá pa mas ku 20 aña kaba. Despues ku el a haña su ritmo na Ulanda, Curteez a ekspandé su relashonnan profeshonal i pronto a kuminsá toka rònt Ulanda komo DJ di músika Dance i House. Un karakterístika di Curteez ta e forma úniko ku e ta kombiná e ritmonan Funky, Latin, Electro i Groovy House durante su presentashon, loke ta garantisá ku e públiko ta keda riba pia. Curteez a establesé su mes komo un eksperto di fiestanan varia, unda e ta meskla músika di dékada 80 i 90, R&B i Hip-Hop, House – Funky, Latin, Groovy i Electro – i mas. Asina e ta konosí no solamente komo e DJ ku un plan maestro, pero komo e maestro ku un plan.
Na aña 2009, Curteez a disidí di dediká mas atenshon na e arte di DJ, unda el a kolaborá ku diferente produktor talentoso asosiá ku BuzzBin Productions. Adishonalmente Curteez ta traha ku e grupo di Reggaeton Ghettoflow i nan produktor MB. “Kolaborando ku MB, mi a siña hopi i mi ophetivo ta pa promé ku fin di e aña aki, mi mes por kuminsá traha mi mes beat”, Curteez a splika. Resientemente, Curteez a kompletá un gira promoshonal eksitoso ku nan na Chersonissos, Gresia.
Keda pendiente pa otro produkshonnan ku Curteez tin na kaminda. Pa mas informashon siguí Curteez riba ritnan sosial na e página di www.facebook.com/CURTEEZ of mail na Media@buzzbinproductions.com pa mas informashon.  Fly ta disponibel na tur radio emisora popular, pues yama i pidi pe.