WILLEMSTAD.- Den un esfuerso pa deskubrí talentonan pa por drenta futbòl pagá, CVV Willemstad i SPORTcode a uni forsa pa por ofresé talentonan skondí un oportunidat pa por yega den futbòl pagá. SPORTcode ta un instituto ku a keda lantá na Dordrecht dor di Dennis van der Gijp ku e meta pa buska i guia futbolistanan, prinsipalmente di e área Karibe Hulandes pa nan por logra haña e kaminda pa futbòl pagá.

CVV Willemstad ta prepará e futbolistanan aki na Kòrsou pa e reto o sea e kaminda pa futbòl pagá. Na e momentunan aki e koperashon entre CVV Willemstad i SPORTcode ta riba un base no eksklusivo, pero partidonan ta den kombersashon pa yega na un akuerdo strukturá pronto. Miéntras entre tantu e trabounan ta kontinuá.

Segun ta keda trese dilanti, tin biaha ta difísil pa futbolistanan di Kòrsou ku muda pa Hulanda por topa ku e persona adekuá ku por yuda nan pa logra nan meta. Den e kaso aki SPORTcode ta risibí e hóben futbolista i ta gui’e, prepar’é i sòru p’e haña e trainingnan nesesario pa nan ta mentalmente, táktikamente i téknikamente bon prepará. Esaki ta e meta ku van der Gijp a pone su dilanti. “Nos tin un mishon, esta pa hisa e nivel di e hóben futbolista mas lihé posibel’, van der Gijp ta añadí. Esaki ta e motibu prinsipal ku CVV Willemstad i SPORTcode a kuminsá ku nan koperashon pa di un forma mihó posibel duna e hóbennan aki e kaminda pa kana.

E yu di Kòrsou Giordan Craanberg ku tin e proseso di guia den su man, a duna di konosé ku ya kaba riba un base regular nan ta haña hóbennan interesá for di Kòrsou pa registrá na SPORTcode i tambe di parti di e hóbennan yu di Kòrsou ku ta bibando na Hulanda. E loke ku ta hasi e kontakto plasentero ta ku hopi biaha e hóbennan ya konosé otro dor di a hunga bala na Kòrsou.

...Giordan Craanberg ta e persona ku ta risibí e talentonan...

Craanberg kende ta representante di futbolistanan i tambe masahista, a splika ku e echo ku e hóbennan ta topa ku un hende ku por papia nan idioma ta hasi e komunikashon muchu mas plasentero i nan ta sinti nan mes muchu mas mihó. Ya na e momentunan aki pa medio di e koperashon ku CVV Willemstad, Craanberg tin kontakto ku mas o ménos 35 hóben repartí riba henter Hulanda.

Dia 21 di òktober benidero SPORTcode tin un wega di fogeo kontra di un klup ku ta forma parti di e organisashon di klupnan di bala pagá.

Pa CVV Willemstad, e koperashon aki ta di sumo importansia i via di CVV Willemstad, e futbolista por skohe si e ke sigui su karera via di SPORTcode na Hulanda. Ku e koperashon aki CVV Willemstad, ta kumpli ku e plannan ku nan tin pa e trayekto pa logra futbolistanan lokal den sektor profeshonal.

Pa mas informashon di e akuerdo aki por manda app pa Philip Chapman via di 005999 514 8118.