NEW DELHI, INDIA, AP.- Dalai Lama ta spera ku e presidente merikano, Donald Trump, i su homólogo ruso, Vladimir Putin, por traha huntu pa pas mundial.

Mundu mester di lidernan ku kompashon, segun e lider spiritual di budistanan den deklarashon na un programa di New Delhi djasabra organisá pa e sekshon femenino di un grupo industrial, segun un komunikado.

Segun Dalai Lama, mundu mester move direkshon di paso i sin violensia. Dalai Lama ta spera ku Trump i Putin ta traha huntu na fabor di krea pas den mundu.

Aña pasa novèmber, e lider spiritual a bisa na Mongolia ku elekshon di Trump komo presidente di Merka no ta un preokupashon p’e i ku e ta deseando di reuní ku Trump despues ku e bira presidente.

Dalai Lama a reuní ku otro presidentenan merikano den pasado, inkluyendo kuater bishitá na Barack Obama. E reunionnan aki ta un molèster pa Beijing, ku ta akusá e lider tibetano di separá di Tibet di China. Dalai Lama a bisa ku e ta simplemente buskando un grado di outonomia mas grandi bou di e gobièrnu chines.

E lider spiritual ta biba den Dharmsala, na nort di India, despues di hui di Tibet durante un manifestashon kontra outoridat chines na 1959.