I.B.F.F. a instalá partisipantenan pa Miss Curaçao Teenager 2020 ofisialmente
Danila Magdalena a resultá Miss Curaçao Teenager PRESS 2020

WILLEMSTAD.- Ayera tardi den sala multifunshonal di PWFC, International Beauty and Fashion Foundation (I.B.F.F.) a presentá su 8 partisipantenan ofisial pa Miss Curaçao Teenager 2020 na miembronan di prensa i pueblo di Kòrsou. Riba un esenario espektakular di Leo Sound and Lighting, un show na nivel kordiná pa Vision by Ludwig i direktora Ayanette Statia i ku a keda transmití pa e kanal di beyesa, televishon Direct kanal 13, Kòrsou a sera konosí ku e beyesanan partisipando na e sertámen di Miss Curaçao Teenager 2020. Durante di nan presentashon kada partisipante a kompartí su pensamentu i opinion tokante e ròl i importansia di prensa den nos komunidat. Nan a kòmbersá ku e kuerpo di hurado konsistiendo di miembronan di prensa i tambe nan a skohe nan number ofisial di partisipashon pa e temporada 2020. E numbernan ofisial di partisipashon ta: #1 Rigene Isenia; #2 Daïsha Jansen; #3 Liyanne Hoevertsz; 4 Danila Magdalena; #5 Cyara Bazoer; #6 Nàtania Dolorita; #7 Marlen Ignacio i #8 Chelsea Valies. Na final di e atardi miembronan di prensa unánimemente a skohe partisipante number 4, Danila Magdalena, komo ganadó di Miss Press, e promé título pa e temporada di Miss Curaçao Teenager 2020.

I.B.F.F. ta orguyoso i ta wak bèk riba un show na nivel i ku a sa di mantené su mes na tur e reglanan preskribí di higiena pa tur presente por a disfrutá di un bunita show.

Danki ta bai na tur e spònsernan ku a hasi e show posibel. Revlon, Cspirit, Leo sound and lighting, Nestor Zavarce, Chilbert Catering, Krus Kòrá Kòrsou, Geonella Sandries, Inspiracion Curaçao, Ruchandry Straker, LAPD Curaçao, Les Cheveux, Obelysque, Charms Accessories Curaçao, Royal Rentals, Tv Direct kanal 13, Skin Beauty Center Curaçao, Prime Restaurant i SH social media.

‘GALA OF BEAUTY

I.B.F.F. ta kla pa presentá su siguiente show djasabra awor, 3 di oktober 2020. E show ta hiba e título ‘Gala of Beauty’. Durante e show aki e 8 beyesanan lo kompetí pa e diferente títulonan di e anochi. Pueblo di Kòrsou keda pendiente pa mas espektákulo di beyesa organisá pa I.B.F.F.