PUERTO RICO.- E kantante Danny Rivera a kombertí su mes den e promé portorikeño ku ta keda nombrá komo embahador di e Instituto Latino de la Musica, asina e entidat a informá ayera na New York.
‘For di su kuminsamentu i ku mas di mei siglo di karera musikal, Danny ta un dje bosnan mas importante di Karibe i mester rekonosé tur loke el a hasi i duna pa e pueblo di Karibe i America Latina’, asina Daniel Martin, direktor ehekutivo di ILM a indiká.
Rivera e bos nashonal di Puerto ¿Rico ta konta ku mas di sinku dékada riba tarima i mas di 75 grabashon den kua el a inmortalisá komposishonnan di entre otro Agustin Lara, Rafael Hernandez, Roberto Carlos i Alberto Cortez manera: ‘Piensa en mi’; ‘Ausencia’; ‘Madrigal’; ‘Jesucristo’ i ‘Mi árbol y yo’.
Otronan riba e lista largu ku públiko a hasi nan preferí ta ‘Mi Viejo’; ‘Tu vives en mi pensamiento’; ‘Para decir Adios’; ‘Amada Amante’; ‘Tu pueblo es mi pueblo’ i ‘Ausencia’.
Rivera kende tambe ta outor i filántropo i ku a aktua den obranan di teatro na New York i nominá pa Grammy Awards pa e produkshonnan ‘Muy Amigos’ i ‘Homenaje a Tito Rodriguez’, ta e úniko solista portorikeño ku a presentá na kuater okashon den e sala legendario di Carnegie Hall, Rivera a hasi esaki na 1979, 1989, 1999 i 2010.
Mi ta sinti mi hopi honrá pa e rekonosementu ku e Instituto Latino de la Musica ta duna mi, pa mi e ta un orguyo di por pertenesé na e kultura artístiko di Latinoamerika pero mas ku tur kos, representá mi pais komo un embahador kultura’, asina e kantante a afirmá.
Fecha i lugá kaminda e rekonosementu lo bai wòrdu entregá lo keda anunsiá despues.