WILLEMSTAD.- Despues ku dia 31 di desèmber último sra. Mirna St. Jago a presentá su último programa na Mi95 i dje forma ei a pone final na un karera impreshonante di 51 aña laborando pa emisoranan Curom, spesialmente den oranan di mainta den siman, entrante djaluna último, 4 di yanüari Dany Balentien ta pasa pa okupá e orario aki di 9 or di mainta pa 12 or di mèrdia na Mi95.

Dany, pa 1 aña kaba a kompaña i entretené e oyentenan di Mi95 for di 7 or pa 9 or di mainta, di djaluna pa djabièrnè, ku su programa super variá.

Mirando e éksito i e bon reakshonnan ku e programa ‘Dany Mainta’ tin, gerensia a opta pa manda e programa pa e orario prinsipal di 9 or pa 12 or di mèrdia.

Den ‘Dany Mainta’ nobo lo bo bai disfrutá di tres ora di bon músika, tópikonan interesante, teksto di dia, notisia di farándula lokal/ internashonal, segmentonan nobo i mas. Awor bo por app ‘Dany Mainta’ tambe via 5999-524-3465.

Di djaluna pa djabièrnè, 9 or pa 12 or di mèrdia, bo tin un sita ku Dany Balentien na ‘E kapital di Músika’, Mi95.