WILLEMSTAD.- Tigres de Chinandega, ekipo di Yurendell de Caster, Curth Smith i Dashenko Ricardo den liga di beisbòl profeshonal nikaragwense, ta den playoff. Den wega di ayera i awe nochi, nan tin ku disidí si e ekipo ta finalisá kampionato regular na promé puesto i di e manera ei klasifiká dirèkt pa playoff final.

Tigres i Gigantes de Rivas tur dos promé ku e wega di ayera tabatin marka di 25-21, empatá na promé lugá. E dos último fechanan di temporada regular mester trese klaridat kua di nan dos ta pasa dirèkt pa final.

E number 2 i number 3 di temporada regular lo enfrentá otro den playoff best-of-5 entre 6 pa 11 di yanüari, pa disidí e di dos finalista.

Despues di esei, riba djabièrnè 13 ta start ku e final ‘best-of-7.

Curt Smith entre lidernan ofensivo

Curt Smith ku ta patruyá den rightfield pa Tigres, ta e lider indiskutí di su ekipo i ta figurá entre lidernan di e liga.

...CURT SMITH; lider indiskuti di Tigres...

Den weganan di fin di aña el a kai poko atras i te ku ayera tabata number 4 den kantidat di hit dje liga ku 62, nr. 3 den averahe ku .390, nr. 2 den homerun ku 10 i nr. 2 den kareda empuhá, ku 39.

Dashenko Ricardo promé ku e wega di ayera tabatin averahe di .253 ku 14 RBI. Di su parti Yurendell de Caster ta haltu ku averahe .325 i 26 kareda empuhá.

Por sierto ku tabatin duda ku Yurendell lo ta den e wega di ayera nochi pa motibu di leshon. Pero na último momento el a risibí lus bèrdè di parti di kuerpo médiko di su ekipo pa por a hunga.