WILLEMSTAD.- Djasabra  último  tabata tin estreno di e komedia ‘Dede  den Kehos’.
Algun aña pasá ya Dede tabata riba podio pero e biaha ei, Dede tabata den kas di ansiano. Den kas di ansiano Dede tabata pone tur hende ariba bou ku su kosnan ku e tabata hasi.
Awor Dede mester a bai Kehos pa un tratamentu i estando den hospital Kehos,  Dede no a kambia na nada. Dede di un manera maestral ta orkesta ku huntu ku dos amigu ku e a sera kuné den hospital, ta sali for di Kehos i ta bai dal ròm  bèrdè no muchu leu for  di hospital.
Henter e sistema kon  esaki ta sosodé ta un hilaridat kompleto. Na mes momentu e públiko ta haña e oportunidat pa konfrontá nan mes ku e problemanan ku Kehos ta konfrontá kuné,  ku ta pone ku hopi kos ta bai for di man i ta pone ku hopi hende ta haña miedu di Kehos. Diferente trahadó ta man na kabes sin sa kiko ke hasi.
Rose Concension, eskritor di e obra a hinka esaki asina bon den otro ku maske bo ta hari, bo ta realisá ku e hospital Kehos di mas di 160 aña tin su retonan,  pero ku na mes momento a duna nos komunidat e kuido  ku nos tabata tin mester. Rose a logra hinka den e obra hopi faseta,  ku tur hende ta kapta e mensahe ku e ke manda.
E parti  kon e hospital a kontribuí na bienestar di nos komunidat ta sali masha bon mes den e video ku un soeur, ku ta bin bishitá Kehos, ta presentá.
Dede, apesar ku e ta un simpel pashènt  ta bira masha importante den e totalidat di e obra  i ta sòru pa un  buèlta sorprendente.
Klaro ku sra. Sussy Candela Blunder, minister enkargá ku salubridat,  no por keda afó i e hilaridat ku su presentashon ta trese den e públiko durante di su rueda di prensa ta hopi grandi.