WILLEMSTAD.- Antonio Keller ta mucha di Brievengat, ya for di edat hóben el a kuminsá hunga beisbòl den bario. E tempu ei tabata beisbòl tur dia den Brievengat. Charles, “Baba” Quami, amigu i mentor ta rekordá hóbennan manera: Melvin Thomas, “Papasito” Eustatius, Ossie i Luti Dalnoot, Siegfriedt Polonius, Papa i Payá Martha, Eithel de Caster, Bienvenido Phillipsson, “Payo” Hooi, “Gigi” Hooi, Lupi Yueng i masha hopi otro mucha di bario. Nan tabata hunga “Grandi” vs esnan mas “Chikí”, e tim ku gana tabata haña un kaha di limonada, “Baba” Quami ta rekordá.

                                                       ...”Tonchi” A Start komo 3B...

“Tonchi” a kuminsá den beisbòl komo tersera/base, i despues el a bira picher riba proposishon di “Baba”. “Nos tabata train tur dia, “Tonchi” i “Papasito” Eustatius tabata keda tira, Melvin Thomas tabata nan catcher. Mi tabata bisa nan esun ku tira bola ta:”(........)...(Ántes niun mucha no tabata ke e kos ei)

                                              ...E No A Hunga Little League, ni Hubenil...

Antonio no a hunga beisbòl Little League, ni hubenil, ni klase A. Na aña 1969 el a subi pa doble A huntu ku e tim di Ponce Lions. I tabata hunga prinsipalmente rightfield. E siguiente aña despues ku Ponce a degradá, Antonio Keller a bai e tim di Wild Cats. I ei e éksitonan grandi di Antonio, “Tonchi” Keller a kuminsá.

                                                                  ...Éksito Pa No Kaba...

“Tonchi” komo picher estelar di Cats a kampeonisá e tim na 6 okashon. Na aña 1979 “Tonchi” a pasa pa Royal Scorpions despues di a picha den kampeonato Europeo pa e tim Ulandes Kinheim, i yuda Royal Scorpions kampeonisá. E aña siguiente, “Tonchi” a regresá Wild Cats, ku Cats di spònser pa “Something Spesial” a kue nan título bèk. Antonio Keller a gana tur tipo di premio den su ilustre karera. Djis algun: Na 1975 “Hungadó Mas Valioso” di Kòrsou, e aña siguiente na 1976, el a ripití komo “MVP”, skohé pa Asosashon di Kronistanan Deportivo di Kòrsou. Na 1980, Keller ku Wild Cats/Something Special a kampeonisá aki na Kòrsou den un torneo Internashonal organisá pa Federashon di Beisbòl di Kòrsou. Antonio Keller a picha i bati den masha hopi torneo Internashonal. E tabatin aktuashon destaká den kompetensia regional na Cuba, tambe den Siman di Beisbòl di Haarlem, na Ulanda.  Di Kopa Antiano no papia mes, Keller semper a dominá. I gana vários premio di MVP. Den wega di klasifikashon pa traha selekshon di Antia Ulandes, Kòrsou por a konta ku 2 triunfo sigur di “Tonchi” Keller, ounke Aruba tambe tabatin bon picher manera: Eli Kock i “Pajou” Briezen.

                                         ...Kòrsou Tabatin Su “Shohei Ohtani” 50 Aña Pasá...

Ta bale la pena bisa ku Kòrsou 50 aña pasá ya tabatin su “Shohei Ohtani”, ya ku Antonio Keller fuera di picha tabata bati honron. Ku 69 triunfo i apénas 13 derota, Keller ta e picher mas ganadó di nos beisbòl di tur tempu. Su 19 honron (nan) tambe ta un rekòrt sigur pa un picher. Antonio Keller tabatin algun hazaña inkreibel komo pelotero. Den Lago Sportpark na Aruba, “Tonchi” a saka e bala den leftfield, Umpirenan a dekretá e bala “foul” i Keller mester a bin bati atrobe. Riba e siguiente lansamentu “Tonchi” a saka un bataso mas leu den “fair”. Komo esei no ta basta, e mucha di Brievengat a ripití e hazaña ei den “E Siman di Beisbòl di Haarlem” na Ulanda. Antonio Keller su historia den nos beisbòl ta realmente largu i briante.

                                                           ...Try-out Ku Yankees...

Tambe huntu ku “Pablito” Beaumont, “Tonchi” Keller a bai un try-out ku New York Yankees, pero ya nos ídolo tabatin 21 aña di edat.

                                            ...Standing Ovation Pa Antonio Keller...

Na aña 2.000 ku Antonio ya ku 45 aña, Oscar Bolivar a organisá un wega di despedida pa Antonio Keller. Hensley Josephina ta rekordá ku e fanátikonan den Stadion a lanta para i duna Antonio Keller un “Standing Ovation” pa algun minüt. Den e wega ei pichando, Djuric Pietersz a dal Antonio un honron, el a rekordá Djuric ku su Tata ku ta Willie Pierersz tambe a bati un honron kontra di dje. Den e wega ei mes, bateando, Keller a demostrá e klase ku e tabatin komo batidó. Apesar di su edat el a manda un bataso te kantu di waya.

                                                   ...Mènedjer di Groot Kwartier Stars...

Antonio Keller tambe a fungi komo dirigente di Groot Kwartier Stars. “Tonchi” a dirigí e tim di Groot Kwartier Stars remplasando “Fichi” Fleming dia ku “Fichi” a baha komo mènedjer. E tabatin “Yubi” Mercelina i Darnley Damoen komo su “coachnan”.

                                                    ...Antonio Keller “Hall of Famer”...

Na aña 2017 a dediká e kampeonato di beisbòl veterano na Antonio, “Ké” Keller i Ivette Lopez. Pa su gran méritonan komo pelotero, na aña 2017 Antonio Keller a drenta Salon di Fama di nos deporte.

                                                                  ...Super Humilde...

Antonio Keller tabata apesar di su fama, un hende super humilde, hopi “ketu”, i asta ni bo no ta sa mes si e tei. Den su tempu komo pelotero, Antonio tabata realmente stimá i gustá pa fanátikonan di beisbòl, sigur esnan di Wild Cats. Apesar di esei semper e tabata hopi trankil. Tabata sin duda tempunan inolvidabel di beisbòl. Hopi selebrashon, “Tonchi” no tabata gran bailadó, pero si “Combo Felipe” toka e merengue, “Al Oscuro”, e no tabata sinta, i tabata kue su piesa.

                                                            ...E No Ta Laga Amigu Kai...

Si bo tabata su amigu, nunka e lo laga bo kai. Taffy de Jongh ta rekordá kon nan tabata na Ignacius College huntu pa algun aña, amigu manera ruman, no di skol so, di kas tambe. Dia “Tonchi” a bai Hendrik School, i ku nan a bira kampeon. “Tonchi” a bisa ku ta reforsá ku Taffy de Jongh, i den torneo Interinsular na Aruba el a pone su mes den shòrt, pa su amigu habri e wega. Dje bon amigu ei e tabata.

                                                           ...Un Di Esnan Di Mas Grandi...

Sin duda un di esnan di mas grandi di nos beisbòl a bai nos dilanti, e mihó picher derecho di tur tempu, i sigur dje époka di gloria di nos beisbòl ku míles i míles di fanátiko yegando Stadion. Un batidó temibel di forsa i ku semper a sa di marka e diferensia na banda di esun ku el a hunga p’e.

                                                                  ...Akto di Entiero...

Akto di entiero di e gran Don Antonio Keller lo ta awe djárason 1 di yüli. Ta risibí bishita di kondolensia for di 1or di mèrdia na Consolador na Brievengat. Famianan ta pidi pa presentá na trahe alegre.

                                                     ...Danki Pa Tur Kos...Te Despues !!...

Antonio, Tonchi, “Ké”, Antoine, drumi dushi, danki pa tur loke bo a hasi pa beisbòl. I danki pa tabata nos amigu di kurason. Te despues !!

Skibi pa: Taffy de Jongh.

Datos: Rudy Cicilia.