WILLEMSTAD.- Defensa awor tin e tarea permanente di vigilá kontinuamente e situashon di siguridat alrededor di e parti Karibense di Reino. Ku esaki, Hulanda ta fortalesé su posishon di informashon den region. Esaki ta hasi posibel pa antisipá desaroyonan geopolítiko i destabilisante na tempu. E gabinete hulandes a anunsiá esaki.

E situashon di seguridat den Karibe ta mas kompleho komo resultado di oumento di tenshonnan geopolítiko. Pa mantené un imágen aktualisá di e situashon, bon monitor di menasanan den e region ta importante.

Mihó konsientisashon di situashon

For di sèptèmber aña pasá, Forsanan Armá ya kaba ta vigilá e desaroyonan den e área ku un mandato temporal. Sinembargo, tin un nesesidat grandi pa informashon adishonal kontinuo pa loke ta trata laman Karibe i e aktividatnan di tantu aktornan estatal komo no estatal.

Awor Defensa a haña e tarea di sigui e desaroyonan riba tur tereno, keda alerta i wak si esakinan por afektá e parti Karibense di Reino. Esaki ta pèrmití e Forsanan Armá pa identifiká i interpretá menasanan mas lihé. Un ehèmpel di esaki ta monitor kambionan den e presensia militar i aktividatnan di otro paisnan den e region. Dor di monitor e desaroyonan aki strukturalmente, Defensa por identifiká kambionan na tempu.

Implementashon struktural

E tarea ta keda  integrá den e òrdu di preparashon eksistente di Forsanan Armá. Hasiendo esei Defensa ta duna un kontribushon struktural na protekshon di interesnan di Reino.

Defensa ya kaba ta presente permanentemente den e parti Karibense di Reino ku personal i ekipo di e diferente ramo di Forsanan Armá. Hasiendo esaki, Defensa ta kontribuí na protekshon di integridat di e teritorio di e parti Karibense di Reino, na mantenshon i promoshon di e òrdu hurídiko internashonal, i dunamentu di asistensia na outoridatnan sivil.