ASUNCION.- E delegashon di Kòrsou a siguí ku su partisipashon den Weganan Suramerikano den fin di siman. Kòrsou a partisipá den e último dianan den ahedres, tènis di mesa i bòkseo.

Den ahedres e hóbennan  Dianthely Pourier i Rishab Anandbahadoer a representá Kòrsou. Dianthely di 14 aña i Ridhab di 15 aña tabata esnan mas hóben den e kompetensia aki di ahedres.

Pa loke ta trata Dianthely el a kompetí den kategoria ahedres rápido. E hóben hungadó di ahedres a finalisá na último den e klasifikashon. El a enfrentá vários hungadó ku eksperensia durante su partisipashon. El a enfrentá tambe e Claudia Amura di Argentina ku a gana medaya di plata.

Pa loke ta trata Rishab e tambe a keda na último den su klasifikashon. El a hunga 7 partido den e kategoria rápido, pero a finalisá sin punto.

Den tènis di mesa Dimitri Leon a representá Kòrsou. El a enfrentá David Leon di Paraguay. E promé sèt a bai fásil pa David Leon ku a gana ku skor di 11 pa 4. Den e di dos sèt Dimitri ta bòns bèk i gana ku skor di 11 pa 9. Despues di esaki David Leon ta bin bèk pa gana tres sèt siguí, pa asina gana e wega kuater sèt pa unu.

Den bòkseo Dwinley Mathilda a partisipá den e kategoria 80 kilo, miéntras ku Gregory Scharbaai a partisipá den e kategoria 71 kilo.

Dwinley Mathilda a enfrentá e kolombiano Jhojan Caicedo Sinisterra den e kuart final di e disiplina. Dwinley a kai kontra Sinisterra ora rèfri a para e pelea na 1.55 di e promé rònt.Esaki despues di dos “knockdown” ku Dwinley a sufri.

Pa loke ta trata Gregory Scharbaai a enfrentá e kolombiano Alexander Range Maddriaga. Scharbaai a sufri un “knockdown” den e promé rònt. Ku e tempu di 0.40 den e di dos rònt, rèfri ta para e pelea i asina Maddriaga ta gana asina di Scharbaai.