SAN FRANCISCO, AP.- E banko Wells Fargo a keda akusá ayera den un demanda federal di nenga ilegalmente fiansa di studiante na imigrantenan hóben ku ta den problema ku deportashon i tin pèrmit pa traha i studia na Merka esaki danki na e programa di eks presidente Barack Obama.

Wells Fargo a bisa den un komunikado ku e ta desepshoná ku e demandantenan a presentá un demanda en bes di buska solushon ku e banko.

E imigrantenan hóben tin number di seguro sosial i dokumentonan ku ta kumpli ku e rekisitonan ku banko ta pidi riba identifikashon, sinembargo Wells Fargo a nenga nan krédito pa nan kondishon migratorio, esaki di akuerdo ku e demanda ku e fondo mèksikano merikano di defensa hurídiko i edukashon a entregá.

“Ta hopi importante for di nos punto di bista pa establesé reglanan kla kontra di e klase di deskriminashon ei i en partikular den e tempu aki”, asina Thomas A Saenz presidente i abogado di MALDEF a bisa.

Ku e demanda ta pretendé ku un tribunal emití un òrdu ku ta deklará diskriminatorio e maneho i obligá Wells Fargo pa duna fiansa na e hóbennan benefisiá ku e programa di Deferred Action for Childhood Arrivals.