WASHINGTON, AP.- E demókratanan di Kámara di Representante kier aprobá un lei ku ta duna 2 mion inmigrante siudadania apesar di Kas Blanku su menasa di usa e poder di veto.
E posibilidat ku e medida ta kombertí den lei ta praktikamente nulo, pero ta un oportunidat di e demókratanan pa ekshibí akshon pa un di su máksimo prioridatnan.
Ademas, esaki ta e bataya mas resien entre e demókratanan kontra e grupo republikano i presidente Donald Trump relashoná ku e tema di inmigrashon.
E republikanonan ta denunsia ku e inisiativa no ta kontené medidanan di seguridat na frontera ku nan ta eksihí komo kondishon pa aprobá un lei di inmigrashon. Kas Blanku a manda un karta na legisladornan menasando ku lo usa poder di veto kontra e proposishon ku segun nan a bisa lo “animá inmigrashon ilegal” sin “defendé nos frontera”.
E medida lo protehá hóbennan inmigrante ku a yega e pais for di nan infansia kontra deportashon i duna siudadano.
Ofisina di Asuntu di Presupuesto di Kongreso a kalkulá ku mas di 2 mion persona bibando den Merka lo benefisiá for di e inisiativa aki. E análisis ta kalkulá ku e medida lo kosta mas di 30.000 mion dòler durante e próksimo dékada, spesialmente dor ku mayoria di e migrantenan por haña servisio di asistensia públiko.
