Un bon siman pa nos lektornan...

Kon a bai ke wikènt? ...

Kòrsou tin su embahadornan pa Karnaval 2018...

E wikènt tras di lomba a konta ku tres elekshon i tur tres a kana bon...

Tin algun punto si ku ta di preokupashon...

Kantidat di públiko ku a asistí na elekshon di Rei i Reina Tiner, meskos asistensia na Reina, Prens i Pancho di Karnaval tabata pober, sigur bou dje kantidat ku a kustumbrá di mira na e elekshonnan...

No a promové nan dos miéntras a logra pa esun hubenil tabata grátis i a risibí tur atenshon den medionan di komunikashon...

Pa loke ta trata maestronan di seremonia, djasabra i djadumingu tremendo...

Djabièrnè mi amigu a kere ku ta na pista e ta!...

Pabien na Shurendi i su tim ku a traha riba e dekor di ámbos stage, tantu esun na Kleine Werf komo esun na Sambil, tremendo trabou...

Christine Dania, nos Reina di Karnaval 2018 a logra su meta di bira Reina di Karnaval...

Pará riba stage ta yora promé ku resultado keda anunsiá bo ta komprondé kon emoshon por subi un hende ku su soño tabata pa logra e meta di bira Reina di Karnaval...

Segun mi e puntuashon entre Christine i Denise no tabata masha leu for di otro, ámbos damita a duna tremendo presentashon djasabra anochi...

Awe ta promé fecha pa Festival di Tumba 2018...

63 komposishon a inskribí pa partisipá i ayera nos a risibí e lista di AMAK...

Mester hasi menshon dje echo ku tin kantante ku riba facebook a indiká ku nan lo no ta partisipando mas e aña aki, pero tòg nos a mira nan nòmber riba lista...

Mi ta spera ku awe durante di dia e organisashon musikal manda informá AMAK di esaki...

Tin informashon ta kore rònt tambe ku tin un banda mas ku tin problema pa kaba di harma tumba di un dama kantante...

Te ku djasabra e situashon tabata mustra pèrèmpèmpèn pa e partisipashon dje dama kantante...

Ayera, ‘Domingu di Ensayo’ ta masha fanátiko di bandanan a move bai sitionan di ensayo...

Ora ‘DEN E BEMBE’ a sali Festival Center ayera nochi nos a kore via di Gosieweg pa bai EXTRA...

Na ensayo di ERA ku a tuma lugá na Roxo, eks Pita Supermarket, tabatin un aglomerashon di outo stashoná te riba Gosieweg...

Hopi hende mes na e ensayo...

Ekspektativanan pa algun kantante popular ta bastante haltu...

For di e sede di un dje bandanan ku ta ensayá den Saliña nos a risibí informashon via WhatsApp di un hende ku a bai ensayo indikando ku ora bo skucha e tumba di un kantante bo kurpa ta bisti...

Nan a gaba e tumba masha tantu mes, ta ko’i skucha e siman aki...

Pa awe nochi nos lo tin presentashon di 1 eks Rei di Tumba, den e kaso aki Djuric Virginie ku lo presentá ku Gentz, e último banda pa awe...

Otro ku lo presentá awe nochi ta Dibo Doran ku den e último 8 aña nan segun mi a sali na 4 okashon komo promé finalista, 1 biaha 2, 3 i 4 finalista...

Johnny Cornelia, un dje kantantenan ku tur aña ta den e finalistanan tambe ta presentá awe nochi ku Muziekschool Maria Cornelia...

Otro kantantenan ku tambe lo tin bista riba nan ta eks Rei di Tumba Hubenil, Xechell Jacobs i Chony Nahr i John Francis Jacobs...

E dos últimonan konsiderá tremendo intérprete di Tumba...

No lubidá riba Ray Lauffer ku tambe ta un kantante popular i ku tabatin bon presentashon di Festival di Tumba...

Representando e damanan Roella Jacobs lo ta un karta prinsipal i tur hende lo ta pendiente pa wak ta kua ‘kick’ “King B” ta bai bin kuné pa Tumba 2018...

Nos tei move, mañan nos lo tei ku komentarionan relashoná ku Festival di Tumba 2018 su promé anochi...

Bon Siman !.