Un felis djabièrnè pa tur nos lektornan...

Awe ta fecha pa e gran final di Festival di Tumba 2018... 

Awe e kompetensia lo ta fuerte, no tin un ganadó fiho pa e festival loke ta pone ku e presentashon awe nochi lo ta di gran balor pa hopi di esnan ku ta faborito den e final aki...

Ensayonan ayera nochi na sierto sedenan tabata kargá ku públiko pa tende si a bin kambio...

Awe nochi den e 12 bandanan ku lo presentá tin segun mi konteo 8 kantante ku a klasifiká pa promé biaha, esaki sigur tabatin influensia riba algun kantante konosí ku a keda for dje final...

Tur 4 eks Rei di Tumba ta den e gran final loke ta hasi e anochi bira aun mas interesante...

Mirando ku e show ta kuminsá awe mas tempran tabata sumamente importante pa bo haña un number den e órden di presentashon ku ta kai na e momentu perfekto ku e públiko ta ‘bibando’ ainda ku e partisipantenan...

Si e públiko yena Festival Center for dje momentu ku Doble R kuminsá den showtime awe nochi, esaki lo tin influensia mas lat den anochi...

Ta e stamina dje públiko ta bai hunga e ròl importante si nan ta kla pa ‘biba’ ku e kantante durante di su presentashon...

Tene na kuenta ku nan tin nan faborito i ku podisé ora bo presentá si nan no tin bo komo nan faborito lo bo tin e trabou difísil pa kombens’é nan pa ‘biba’ ku bo presentashon...

Mi ta spera ku awe Feco no papia mas riba ‘Porta Potty’ i wc públiko...

Ayera ma pidi nan pa no papia riba esaki, paso e nota un punto pa bo atendé den un konferensia di prensa, pero Feco kier a papia riba kon e hendenan ta verstòp e toiletnan i te hasta verstòp ‘Porta Potty’...

Komportashon den baño ta algun mas importante sigur si ta na un evento kaminda tin masha hopi hende ta asistí, pero pa bo keda papia riba esaki si ta di mas...

Pa awe nochi e kompositornan ku tin vários komposishon den final ta entre otro Ike ku 3, Gregory Colina ku 4, Bibi Gonet ku 2 i Hendrik de Windt ku 2...

Pa loke ta trata e parti di areglo Gregory Colina ta enkabesá e lista ku 5 areglo den final, sigui pa Ravello ku 4 i Gedion, Titi i Axel ku 3 areglo...

Un kos ta sigur e bandanan a duna bon presentashon musikal i awe nos ta sigur ku esaki lo bai ta e kaso atrobe...

Ocho kompositor ku a yega di komponé un tumba ganadó ta den kompetensia awe nochi...

Kuminsando ku Ike Jesurun, Elia Isenia, Gregory Colina, Amos Balentin, Farley Lourens, Gibi Doran, Axel Pikero i Hendrik de Windt...

Nos konseho pa bo awe ta pa deskansá tempran, wak pa bo yega Festival Center no mas lat ku 6’or di atardi i pa bo buska un bon lugá pa para pa dje forma ei bo kuminsá disfrutá di e show for di na momentu ku Doble R kuminsá ku su presentashon ...

By the way no lubidá ku awe pa 7’or di anochi ta e último momentu ku bo por entregá bo kupòn dje kampaña di Rei ken ta sali ‘Rei òf Reina di Tumba 2018’ na ofisina di EXTRA...

Mas kupòn bo entregá ku e kontesta korekto mas chèns bo tin pa gana...

Ken ta bo faborito?

Kòrda ku riba e página di facebook di EXTRA tambe bo por partisipá na e ‘poll’ pa wak ken ta e faborito di Festival di Tumba...

Entre esnan ku rei e kontesta korekto di e ‘poll’ riba facebook lo rifa un premio great pa bo bai gosa di Karnaval, keda pendiente pa e anunsio djaluna awor den EXTRA...

Nos tei move, gosa awe nochi, sea den Festival Center, na kas, na trabou, na Aruba, Boneiru, Ulanda o unda ku bo ta ...

Festival di Tumba di Kòrsou ta e evento di kompetensia musikal di mas grandi di Karibe !...

Felis wikènt...