Bon siman na tur nos lektornan...

Awor ku Festival di Tumba ta tras di lomba, e selebrashon di Karnaval 2018 ta bai sinta...

Un bataya realmente fuerte tabatin entre e kantantenan faborito ku a partisipá djabièrnè último den e gran final di Festival di Tumba...

Kada un a duna tur di su mes pa duna un tremendo presentashon djabièrnè último den Festival Center...

Mi ta kere ku AMAK lo mester ta hopi kontentu ku e presentashon di nos músikonan djabièrnè último...

Di un forma eksepshonal e músikonan a kompañá kada kantante...

Bandanan a zona bon i esaki sigur ta sigui halsa e kalidat di e festival...

Urvin Jano despues di 20 aña ta keda koroná pa di tres biaha komo Rei di Tumba...

Ray Lauffer for di e anochi preliminar a duna un bon presentashon i djabièrnè e tabata impekabel, tremendo presentashon i su kompositor Amos Balentin tabata masha kontentu mes ku e prestashon di Ray no papia mes dje públiko ku tabatin Ray komo fuerte kandidato pa bai ku e título...

Dibo Doran ta sigui ku su racha di klasifiká den e 5 mihónan di Festival di Tumba...

Dibo a presentá un señor tumba kaminda ONE a duna un kompañamentu tur afó i pone ku e ta keda na di tres finalista ...

Un dje faboritonan fo’i djadumingu promé ku e festival a kuminsá tabata Farley Lourens...

Komo un gran rei di tres korona, djabièrnè anochi Farley a subi tarima ku e konvikshon ku e ta bai duna un super presentashon pa sigurá e puesto di honor...

Farley a batayá bon i na final dje anochi a keda premiá komo e segundo finalista...

Ray Lauffer, mucha hòmber ta kos serio...

Ray a interpretá e tumba di Amos den un forma maestral...

E kompañamentu di Gentz a resultá super bon, poniendo Ray den e faboritonan for di anochi preliminar...

Su presentashon di djabièrnè a konsolidá su puesto komo promé finalista...

Urvin ta klase aparte...

Un intérprete ‘nato’, su manera di kanta ku un tremendo artikulashon ta pone ku kualke bon komposishon ku e risibí ta bira un potensia den Festival di Tumba...

Despues di 20 aña e ta logra di bolbe konkistá e título, pero esaki ta bin tambe ku un tremendo racha di klasifikashon den kua e ta un dje poko nan ku por a mantené su mes aña tras di aña logrando di ta den e Tòp 10...

Urvin un tremendo Rei di Tumba ku awor tei karga Karnaval 2018 ku su ‘Sende Lus pa Kòrsou’...

AMAK por mira atras riba un eksitoso Festival di Tumba...

Públiko a akudí na gran kantidat i a komportá su mes di maravia...

1 òf 2 insidente den un públiko di riba 7 mil hende ta algu mester por atendé...

Despues di Festival di Tumba nos ta pendiente awor pa un sin fin di aktividatnan Karnavalesko manera jump in i aktividatnan sosial relashoná ku Karnaval...

Djasabra a toka turno na Chikitous pa e hóbennan i T’aki Tin pa e grandinan...

Dos bon jump in ku a konta ku bon asistensia...

Ayera nos hóbennan ku a partisipá na Festival di Tumba hubenil a demostrá ku nan tin aden i mesora ta duna bu e satisfakshon ku Festival di Tumba grandi tin futuro ku e tumberonan aki...

Gian van Eiker a gana meresidamente e Festival ku a konta ku bon asistensia...

Ma gosa e promé finalista, Zouk’aino Jacobs...

Mucha hòmber tabatin un adrenalina masha haltu mes kada biaha ku su nòmber keda menshoná...

Great pa mira kon e hóbennan a keda komo grupo uní i a felisidat otro...

Den tur e kos aki ma tuma nota di un komunikado ku Ruben la Cruz, konosí komo MC Pester a manda relashoná ku e derechi di outor ku e ta ‘claim’ riba e komposishon ‘Sende lus pa Kòrsou’, tumba ganadó ...

Den su komunikado MC Pester ta hasi menshon dje echo ku tin diferente fragmento, letra di tumba ganadó ku lo mester ta forma parti di un komposishon di dje ku a keda publiká na 2002 i di kua e kompositor, Darwin Gregg ta den posishon dje CD...

Nos ta pendiente pa wak si Ruben La Cruz lo entamá un kaso kontra di Darwin Gregg ku ta kompositor dje tumba ganadó...

Bon shonnan tabata un plaser...

Mañan ku Dios ke nos tei bèk !...