Un felis djamars na tur hende...

Trabounan di stellage a start for di djasabra i riba ruta di Karnaval tin un ambiente for di awor...

Snèk, bar i restorantnan ta bende i trahadónan di stellage i famianan ya a kuminsá hasi nan mes di kas den nan stellage...

Super dushi ambiente ku masha hopi hende tambe koriendo e ruta di Karnaval pa tira un bista riba e trabounan ku ta tumando lugá...

By the way, Aqualectra tambe ta riba e ruta kontrolando palunan di lus pa wak kua ta den mal estado pa nan por kambia esakinan...

Iluminashon na algun kaminda tambe lo wòrdu drecha den e dianan aki...

Riba retnan sosial tin komentario ketu bai riba e resultado di Festival di Tumba...

Loke ta di lamentá ta ku ta duna reakshon riba sierto tumba ku a klasifiká den Tòp 10 komo si fuera ki mishi e tumbanan ei mes den e Tòp 10, pero ta lubidá ku djabièrnè último den Festival Center tabatin un kuerpo di hurado ku konforme reglamentu di Festival di Tumba a husga tur e tumberonan ku a presentá...

E resultado ta konosí, ta kestion di respetá esaki...

Otro aña traha mas duru pa bo logra drenta e Tòp 10...

Pa esun ku no a logra, perseverá, no entregá, bo ta den un kompetensia i bo mester sigui hasi bo máksimo esfuerso pa bo logra mas...

Jump In ta bai start kuminsando djabièrnè awor ku e dos grandinan MCB i Viva/ SVB...

Ambos ta aktividatnan ku ta logra atraé un grupo grandi di fanátiko...

Djasabra ta Lions i Hak’e. Tur dos ta konosí pa bon ambiente i ta atraé un bon públiko...

Marcha Hubenil e aña aki ta konta ku partisipashon di 13 grupo...

Parada di Tiner tin 18 grupo di kua 7 ta organisashonnan sosial...

Gran Marcha lo tin partisipashon di 24 grupo, sin konta esnan ku ta kombiná ku otro pa muzik...

E biaha aki ta ERA i DREAMS ta e bandanan ku ta animá mas ku 1 grupo di Karnaval...

Awe nochi tin entrega di premio di Festival di Tumba 2018...

Djasabra awor ta fecha pa elekshon di embahadornan di Bándabou...

Tin diferente skol ku tin nan jump up/ jump in den e dianan benidero...

Awe ‘DEN E BEMBE’ ta kompartí e letranan di e tumba hubenil ganadó...

Despedida di Parada di Tiner ta kontinuá...

Esaki lo ta riba mesun djaluna di Despedida Hubenil, e úniko diferensia ku lo tin ta ku e Marcha Hubenil su despedida ta sali 3’or di atardi for di Plasa Hariri, miéntras ku Despedida di Tiner lo sali 5’or for di Jan Noorduynweg...

Te ku siman pasá pa Despedida Parada di Tiner tabatin 12 grupo ku a konfirmá nan partisipashon di 18...

Nos ta pendiente pa tende si a logra kombens’é tur grupo pa partisipá na e despedida...

E situashon pa loke ta trata MC Pester v/s Darwin Gregg ta kohiendo un rumbo di reklamo habrí riba retnan sosial...

Ma tuma nota di post ku ta yama Darwin Gregg ‘Ladron di Text’...

Si MC Pester ke hasi un keho kontra di Darwin Gregg relashoná ku derechi di outor e mester entamá un kaso i laga korte disidí riba esaki...

Start un guera riba retnan sosial lo no yuda ku nada den e kaso aki...

Awor ta interesante pa sa tambe ta kuantu parti di e teksto dje kansion original a keda kopiá, pasó segun mi bo mester tin fragmentonan ku ta kuadra ku otro pa bo por papia di ‘plagio’ o ‘plagiaat’ manera e ta keda yamá na ulandes...

Ban spera ku lo por aklará e situashon aki i ku e no keda biba su bida...

Nos tei move, te mañan ku Dios ke !...