Un felis djárason, nos a yega na fin dje promé luna di 2018...

Ta bai e dianan ta bai riba spit òf ta nos ta dje drùk ei ku nos no ta tuma nota mes ? ...

Ban kuminsá e dia ku e deseo di un pronto rekuperashon pa Manfred ‘Feco’ Gomes, presidente di AMAK ku a ayera nochi a bira malu djis despues di entrega di premio na finalistanan di Festival di Tumba...

Feco a keda trasladá pa Poli i te na momentu ku nos ta redaktando ‘DEN E BEMBE’ ainda nan tabata hasiendo algun chekeo médiko...

Nos ta spera ku e lo por rekuperá i haña e oportunidat pa por deskansá, paso e meresé...

Podisé bo no ta komprondé kon un persona ku tabatin un temporada basta intensivo tras di lomba ta yega momentu ora ku bo kaba ku e trabou ku bo kurpa tambe ta entregá...

Feco ‘Get well soon’...

Ayera nochi a duna Robert de Jesus a pone tur hende hari na momentu ku el a risibí un plakat di estímulo...

Robert a indiká ku hurado no a komprondé su tumba...

El a felisitá Darwin i Urvin Jano ku e título, pero a indiká ku nan a sende e lus, anto pa e importante ta pa ‘Tene e lus sende’ i ta nèt loke e a kanta!...

Tur hende bou di harimentu, pero Robert tin rason...

E lus mester keda sende!...

“Un kriatura ta kab’e nase promé kos k’e ta mira lus
Bo ta sali fo’i skuridat bo ta drenta den kay’i lus
Lus ta energia ,lus ta bida amor i pas
Fo’i boutismo ta sende un bela pa iluminá bo kaminda di pas
Palomba blanku kompañá mi ku klaridat di dia hiba e mensahe di pas
A yega ora pa nos plama lusnan positivooooooo  plama lus riba Kòrsou”

Un parti dje letra di e tumba ganadó ‘Sende Lus pa Kòrsou’ ...

Esaki te siman di Marcha Hubenil i ta basta preparashon ta tumando lugá...

Nos a tuma nota dje donashon ku AGKK a risibí di e organisashon Karnavalesko T’aki Tin...

25 mil florin sigur ta yuda e gruponan Hubenil i Tiner pa kaba di kubri gastunan mará na partisipashon di Karnaval...

Awe nos ta basilando riba letra di algun dje tumbanan finalista...

‘ E Kurason dje ko’

“Bo ta trese alegria i kalor, yena mi pueblo ku sabor Defensor di mi tradishon e motibu pa union Awor ta bo ora pa bo briya i nos desfilá den kaya Koro: Honor na mi tumba orguyo di mi pueblo zona bo 6/8 pa nos por baila awor”...

Hopi letra bunita tin, ta kestion di sinta i analisá e letranan i apresiá loke nos kompositornan a komponé pa Festival di Tumba...

Awe nochi mester a tuma lugá e ‘Festival di Tumba Loko Loko’, pero esaki a keda posponé...

Un pronto rekuperashon tambe pa Liesje Lispier, Liesje ta na kas rekuperando...

Great pa ayera nochi tende diferente dje brandingpartnernan di Festival di Tumba indiká ku nan ta duna nan apoyo pa e di 49 edishon di Festival di Tumba otro aña...

E sosten aki AMAK meresé sigur mirando loke nan a logra e aña...

Ata mas letra aki...

Mi’n ta lage kai...

“Mi’n por maginami un despues di tiru sin su tumba Mi’n por maginami un kaya grandi sin Karnaval Pa humilde ku nos ta, u’n ta tur kos ta ko’i aseptá Asta un pushi inosente, den pèrta e ta ataká Un yu ku stima su mama lo ta un yu bendishoná”...

Bon shonnan nos tei move, awe ta otro dia di trabou, ban sigui produsí pa adelanto di nos Pais...