Felis djaweps...

Karchinan pa Hak’e a kaba, awó negoshi bende karchi mas karu a start...

Sòru pa djabièrnè i djasabra bo bai tuma bo pèchi, pasó ma komprondé ku si despues di djasabra mèrdia bo no a bai buska e pèchi bo tin problema anochi ...

Ta karchi ku pèchi ta entrada pa Hak’e, sin 1 di nan 2 bo ta keda pafó...

Un saludo pa Feco, e ta rekuperando ...

Ba tuma nota dje investigashon ku a hasi relashoná ku selebrashon di Karnaval?...

Un análisis a keda hasí di 2016 i 2017 i sifranan ta komprobá ku Karnaval ta sòru pa un spin off ekonómiko...

Ounke nos ta keda vulnerabel pa e konekshon aéreo, tin puntonan positivo den e análisis riba kua nos mester fiha...

Mi ta sita dos parti importante dje konklushon dje análisis...

“Karnaval di Kòrsou ta representá e mihó di e destinashon akí; e oportunidatnan ku e bishitante tin pa kompartí ku pueblo di Kòrsou ta lanta su deseo pa bini bèk un dia”…

“Karnaval su potensial komo motor pa kresementu den sektor di turismo ta grandi. Stakeholders mester rekonosé ku Karnaval ta un manera pa promové oportunidatnan ekonómiko, pasobra e bishitantenan ku presensiá e evento Karnaval  tin mas chèns di generá lealtat i ingreso pa Kòrsou”...

E kontribushon ekonómiko total di Karnaval ta di 4.35 mion dòler…

Esaki ta un motibu mas pa Gobièrnu habri wowo i invertí mas den Karnaval di Kòrsou…

Aworakí tin e posibilidat pa importá merkansia pa gruponan i risibí eksonerashon di impuesto, pero no ta esei so mester ta un yudansa na gruponan…

Nos mester analisá i yega na puntonan konkreto ku lo yuda engrandesé e Karnaval…

Ku esaki mi ke men no kambia e konsepto ku nos tin pasó ta serka nos so e pueblo ta asina serka dje partisipantenan di Karnaval…

Nos mester yega na un método pa bin bèk ku karosanan bunita den e marcha…

Empresanan lokal mester spònser un karosa durante dje marcha…

No nesesariamente e karosa mester forma parti di un grupo, e por ta den e marcha ku e meta di yuda engrandesé i ta un manera pa duna sosten na e marcha…

Spesifikashon nobo di hanchura i altura di karosa mester bini pa bo por realisá karosanan grandi i bunita...

Nos tin yen hende kreativo riba Kòrsou ku por traha riba diferente konsepto di idea pa karosa...

Esaki ta djis un dje kosnan ku por hasi pa por yuda engrandesé...

Ban spera ku Minister di Ekonomia i esun di Kultura por sinta huntu i yega na un fórmula pa por duna kontribushon pa engrandesé Karnaval di Kòrsou...

Hei, ma sinta analisá e situashon di derechi di outor ku tantu MC Pester i tambe Ike Jesurun a vosiferá i ma traha un artíkulo riba esaki...

Les’é i si bo tin un otro komentario mi ta habrí pa tende di bo, manda bo komentario na lacuriel@hotmail.com...

Awe mainta Polis i Ministerio Públiko ta tene un rueda di prensa kaminda nan lo duna tur detaye kon nan ta bai atendé ku Karnaval...

No solamente ku Marcha pero tambe ku esnan ku faya ku lei, kiko ta e medidanan ku lo tuma...

Keda pendiente pa mañan mainta den EXTRA bo lesa tur e detayenan di esaki...

Ma komprondé ku Jump in di MCB i VIVA/SVB ta super bon bendé..

Ta kestion di kanta ‘sold out’ un djis...

Tur dos ta mañan djabièrnè i djasabra ta Hak’e i Lions...

Nos tei move, te mañan ku Dios ke!. ...