It’s the weekend...

Felis wikènt Aruba, Boneiru i Kòrsou...

Wikènt di Jump In, Marcha Hubenil i yen ambiente...

Un dje eventonan ku a krese na públiko ta sin duda Hak’e...

E evento aña pasá a atraé 3900 hende e aña aki el a ekspandé i yega 5000...

Arte ta aworakí pa por brinda e públiko un bon servisio di bar i kushina...

Konosiendo e promotornan tras dje evento nos ta kombensí ku nan a i ta trahando duru pa logra pa tur kos ta ‘puntjes op di i’ pa mañan anochi e públiko por gosa durante dje evento...

Awe nochi ta Kleine Werf òf parkeerplaats di SVB...

Ambos jump in ta bon bendí i tin nan públiko ‘vast’ ku tur aña ta asistí ...

Awe nochi tin reunion pa lidernan di gruponan di Karnaval, bandanan i dj na Kas di Kultura...

E reunion ta relashoná ku e kontròl di zonido ku lo tuma lugá...

Awe ‘DEN E BEMBE’ tin un artíkulo ekstenso riba esaki...

Ayera nochi ponementu di dranghek a kuminsá, nos mester ta sinsero e ponementu di dranghek a yuda gruponan pa por marcha sin masha estorbo di públiko...

Tin kaminda ku si nan ta mishi ku e hèkinan, pero polis tin e sitionan aki bon kontrolá...

Ba lesa e artíkulo relashoná ku e medidanan ku Ministerio Públiko?...

Wak pa bo mantené bo mes na regla, pasó si bo bai fo’i regla bo ta sintié den bo saku sigur...

Tumbanan Hubenil no ta zonando na radio...

Kiko ta pasando ta warda pa djadumingu pa laga e tumbanan zona? ...

Ounke kuantu sintonia bo tin, toka e tumba pa dje forma ei duna e muchanan e sosten...

Awe desishon ta kai si e evento ‘Calle 9’ ta sigui si òf no...

Segun ‘DEN E BEMBE’ a komprondé e echo ku mayoria banda popular ta bai Karnaval di Bándabou ta pone ku lo ta difísil pa organisá algu i logra di atraé e públiko ku e organisadónan ke pa e evento atraé...

By the way mañan tin elekshon di Reina, Prens i Pancho na Bándabou...

Kolegio San Hose na Barber lo ta e sitio kaminda e evento ta tuma lugá...

Otro aña temporada di Karnaval lo ta mas largu, mester wak kon tei hasi pa mantené e temporada bibu, fechanan ta un tiki leu fo’i otro...

Ekspektativa ta haltu pa mañan anochi tende Mr. Saab presentá huntu ku e orkesta di Randal Corsen durante di e fiesta di Karnaval di Lions...

Ensayonan ta tumando lugá i músikonan ta entusiasmá...

Curaçao Carnival Goes Global, e hendenan di e DOME riba Rooseveltweg tei bek e aña aki...

E aña aki ta di tres biaha ku nan ta organisando henter e ambiente di DOME kaminda bo por bai para wak Karnaval i apart di esei tin transmishon pa mundu kompletu via di diferente plataforma...

Ayera tardi nos a hasi entrega di e premio na e ganadó di e kampaña di Festival di Tumba di EXTRA...

Sra. Ivy Coffy a keda masha kontentu ku e pakete grandi di premio ku el a risibí...

By the way, Ivy ta sabí, si bo gana, hasi manera Ivy, bin ku 2 outo pa bai ku e premionan, pasó 1 outo no ta yega!...

Danki na kolega Sin Poulina, motor tras dje kampaña...

Shonnan tabata un plaser di a kompañá bu awe, nos tei bèk mañan...

Karnaval 2018 t’aki e ta biba !...