Un felis djamars na tur nos lektornan...

Awe nos tei pa kompartí ku bo den otro edishon di ‘DEN E BEMBE’ ...

‘Duna Cesar loke ta di Cesar’..

Glenn Thomas ta keda klase aparte pa loke ta trata su animashon durante di e programa ‘Rumba pa Tumba’...

Ayera nochi un biaha mas tremendo ambiente...

Ensayonan a sigui ayera nochi...

Nos amigu, Lindomar di ESO a move na sigur dos ensayo ayera i esaki sigur ta duna bu e indikashon dje seriedat ku nos músikonan ta trahando pa brinda pueblo un tremendo Festival di Tumba...

Awe AMAK ta kaba di duna e último detayenan relashoná ku Festival di Tumba...

‘DEN E BEMBE’ a komprondé ku e aña aki e área den Festival Center kaminda inskripshon di Festival di Tumba ta tuma lugá a keda ampliá pa dje forma ei por akomodá medionan di komunikashon pero tambe e públiko ku ta bini pa bin gosa dje ambiente ku tin durante e dia di inskripshon...

Djadumingu awor ta inskripshon di tumba...

Feco e dianan aki ta manera un oktopus, e tin ku kaba di regla asuntu di ‘brandingpartner’ pero tambe ta duna man pa fasilitá entrada di músikonan venezolano ku ta bin spesialmente pa forma parti di sekshon di brass di diferente banda...

E refuersonan aki ta nesesario i ta duna un realse kompletu na e areglonan ku ta keda hasi pa kompaña kada un dje komposishonnan partisipante...

Despues ku Aruba e wikènt ku ta tras di lomba tabatin nan Jump up di Flambeu ‘Fakkel optocht’, un biaha mas tabatin reakshon positivo di masha hopi yu Kòrsou ku a bai Aruba pa disfrutá i djump den e parada...

‘Fakkel’ na Aruba ta un fuente di entrada formal pa gruponan partisipante na Karnaval...

Aki na Kòrsou tur grupo ta organisá nan evento apart i ta yena e kalènder di Karnaval ku jump in...

Den pasado a yega di purba pa algun grupo djòin otro den un jump in, pero esaki na final no a resultá, pasó tin gruponan ku tin un struktura di benta mihó organisá ku otronan loke a pone ku a stòp ku e evento despues di su promé aña...

Kos bon ta ko’i kopia i ‘fakkel’ ta un dje eventonan ku si gruponan uni pa organisá, por pone ku nos ta rebibá e evento di ‘jump up’ riba kaya...

Traha mester traha riba e konsepto i presentá esaki ...

Ta di spera e or’ei ku por sigurá e bon komportashon di públiko pa dje forma ei Polis duna pèrmit pa e evento por tuma lugá....

Na Aruba durante i despues di ‘Fakkel’ a detené 24 persona si mi no ta ekiboká...

For di hende fuma den e parada te esnan ku no por a kore outo pa motibu di bibida...

Aki segun mi nos ta bebe un tiki mas moderá...

JAG fo’i despues di djasabra a keda mané ketu...

FKBB meskos, ta kiko a pasa anto? ...

E organisashonnan mester traha riba promoshon di nan eventonan, aki ratu ora ku e gruponan kuminsá promové nan jump in, nan ta tapa tur otro evento ku ta tuma lugá ...

Ma tende di situashon di evaluashon di pèrmit pa loke ta trata jump in ku ta tuma lugá den sierto áreanan aki na Kòrsou...

Mi ta spera ku no ta bai bini ku mas kondishon pa Jump In tambe...

Ma tuma nota di un grupo ku despues ku supuesto miembronan no a kumpli ku nan kondishon di pago a kuminsá yama tur hende ku ta riba ‘stand by’ pa drenta nan grupo....

Awó si promé mi no tabata bon pa drenta e grupo i haña kondishon di pago fo’i 4 luna pasá, kon mi ta hasi den pitu aki pa tòg partisipá den bo grupo...

Bendementu di lòt i tur sobrá posibilidat pa partisipá den e grupo a bai pèrdí, pero nan tin mester di bo pa awó si bo ta bon pa djòin e grupo...

No ta e grupo so mi ta reklamá, pero tambe esnan ku ta bai inskribí yen spit, pero sa delantá ku nan tin problema pa por kumpli ku e kondishonnan di pago...

Ata bu awor ta kore kabes di gai paso ‘prikichi’ no ta yega i bo no ke keda afó...

Nos tei move, te mañan ku Dios ke!...