Un bon siman na tur nos lektornan..

E siman grandi di Karnaval 2018 ta yegando na su final awe nochi ku Marcha di Despedida..

Tremendo mes e wikènt tras di lomba...

Un dje aktividatnan ku a surpasá tur espektativa tabata e parada di skolnan di Bándabou kombiná ku algun di Pariba...

E marcha ku a keda organisá pa Fundashon Karnaval di Bándabou a konta ku partisipashon di mas o ménos 3000 hóben...

Pabien na FKBB ku e inisiativa aki...

Un parada di tiner kaminda e hóbennan a haña chèns pa un biaha mas demostrá nan kreatividat...

Bon presentashon, pero loke ta di lamentá ku tur e marchanan ta e echo ku a pone esaki ‘kore’ pa yega final na ora òf a  lo ménos kuminsá yega final promé ku e orario di pèrmit vense...

Djasabra Bándabou a bria...

10 grupo a presentá i a ofresé un tremendo Karnaval di Bándabou...

E proyekto di “EXTRA Digital” pa bispu di Gran Marcha ‘Kant’i Kaya’ a resultá un éksito...

E transmishon a bai super bon i ‘Rei di Zongo’, Glenn Thomas tabatin un tremendo eskoho di tumbanan ku a zona durante di su ‘warm up’ pa Zongo mes ku a kuminsá despues dje transmishon...

E aña aki tabata e di 19 aña ku Zongo presentá pa Glenn Thomas a keda transmití, un berdadero ambiente ku tumba i ku un sintonia bárbaro...

No ta wega Glenn tin hende ta sigui na Aruba, Boneiru, Ulanda i aki na Kòrsou no papia mes...

Gran Marcha tabata bunita...

Pa mañan nos lo bini ku nos análisis di Gran Marcha pa dje forma ei nos duná bu loke pa nos a resaltá i loke mester traha riba dje...

Tin diferente grupo ku a resaltá pa tantu bunitesa, ambiente i e goso total...

Karosanan a kuminsá hasi nan entrada bèk den e marcha loke sigur ta pone esaki lusi...

Bandanan tambe a zona bon, mi no a tende di niun hende ku a haña amonestashon pa tokamentu duru, ke men tur hende por mantené nan mes na e regla ku a keda imponé...

E despedida Hubenil ayera tardi a resultá den e parti final den un ‘kore kore’ pa por a yega final i pa djei bai saka e Despedida di Tiner...

Ta di lamentá ku mester kore e marcha...

Riba retnan sosial te hasta e joke di ta spera ku e muchanan lo risibí un medaya ta un indikashon ku a ‘kore’ e marcha...

Despedida di Tiner a kuminsá lat i ta di spera ku e gruponan logra drenta na ora pasó mirando na televishon e promé grupo tabata pasando e punto di transmishon di TeleCuraçao pa mas o ménos 10’or di anochi...

Kuerpo Polisial a hasi hopi detenshon durante dje marchanan ...

Nos ta spera ku e komportashon di públiko lo ta sublime awe pa evitá ku por tin kualke kaso ku lo tin di lamentá despues...

Gosa awe di e Marcha di Despedida...