Un felis djárason pa tur nos lektornan...

Nos tei awe ke último edishon di ‘DEN E BEMBE’ pa Karnaval 2018...

Klaro ku nos no ta kla ku Karnaval, pero loke ta bin despues di awe lo keda kompartí ku otro artíkulonan di farándula normal...

Ayera nochi bo a haña e chèns pa sinta i atmirá e gruponan ku realmente a lusi na momentu ku tira lus riba e trahe...

Tin trahe ta bunita durante di dia i ta bira espektakular anochi...

Esei ta loke ku a resaltá sigur ayera nochi...

E tumbanan ku sigur a resaltá durante di ámbos marcha ta di: Luwi Jano, Clarck Zalm, Roald Balentien, Ray Lauffer i Farley Lourens...

Nan a zona tantu toká pa banda komo dj...

Un tumba ku sigur a sigui profilá den 2018 ta ‘Kara Kara’ ku ta zona ketu bai...

Bandanan a traha bon riba zonido, Rumba Band, ONE, Gentz, Dreams i ERA a zona bon ...

Pa loke ta trata e marcha mes, un biaha mas ta resaltá ku mester yega na un desishon definitivo pa otorgá e dia liber general...

Podisé e mundu komersial no ta di akuerdo, pero mester hasi esaki si bo ke pa e Karnaval sigui desaroyá...

Ayera tabatin 2 barku krusero mará na Megapier...

Si duna e biaheronan e chèns di por mira parti di nos Karnaval e ta un intensivo pa nan por bin bèk riba un bishita spesial pa Karnaval...

Gobièrnu mester sinta huntu ku VBC i sobrá ‘stakeholders’ pa evaluá e ponensia aki i sigur algun mas ku lo duna indikashon pa otorgá e dia liber ofisial...

Mester bin ku un plan pa ‘2020’ nos logra inkorporá algun karosa di spònser pa empresanan grandi na Kòrsou...

Bo tin 1 aña pa bo prepará e konsepto i kumpra e vehíkulonan ku bo tin mester...

Aqualectra di su banda mester pèrkurá pa kabelnan di koriente ku na algun kaminda ta krusa kaya pa esakinan bai bou di tera...

Un karosa sea komo individual òf den un kategoria apart i ku un premio grandi, ban pensa 50 mil florin, ku ta keda di spònser pa Ofisina di Turismo sigur lo ta un kompetensia ku ta hala atenshon di algun di nos mentenan kreativo...

Nos mester duna e Karnaval na e manera ku nos ta organis’é un kambio i dal un stap bai dilanti...

Nos tin hopi potensial ku nos Karnaval, ta nos tin ku dun’é su balor i traha huntu pa esaki sigui krese...

E kantidat di hende pará kantu di kaya a baha, loke ta indikativo ku e hende ke mira algu otro, òf mester drecha e produkto pa atraé e públiko...

E evaluashon di gruponan promé ku nan kuminsá traha riba nan konsepto pa e siguiente aña tambe mester tuma lugá...

Yuda e gruponan ku no tin e nivel ni kapasidat pa por presentá un obra na drechi den kaya...

Esaki ta algu ku AGKK mester traha riba dje...

Mi ta sinti falta di proyektonan edukashonal relashoná ku Karnaval, esaki sigur pa e timnan di kada grupo ku ta traha riba entre otro karosa òf obranan manera ‘roadpiece’ i ‘shoulder piece’...

Organisá algun ‘masterclass’ kaminda ta trese ekspertonan for di entre otro Brasil, Merka i Trinidad pa bin duna lès riba algun punto di interes pa Gruponan di Karnaval...

Karnaval a kaba ayera i awe nos ta pasa pa òrdu di dia...

Otro aña e temporada di Karnaval lo ta un largu, Fundashon JAG mester ta kreativo pa tene e temporada ‘bibu’ ku diferente aktividat...

Falta 382 dia pa Gran Marcha ku lo tuma lugá dia 3 di mart 2019...

Ta parse hopi dia, pero gruponan mester kuminsá prepará for di awor...

Nos tei move, pa nos tabata un plaser di a produsí otro temporada di Karnaval ku ‘DEN E BEMBE’....

Pa djabièrnè awor nos lo tin e promé edishon di ‘Louie Louie’ pa 2018...