Un felis djárason pa tur nos lektornan...

Despues di a biba djaserka e ‘struggle’ di AMAK pa por logra haña brandingpartner pa Festival di Tumba mi mester bisa ku mi ta kontentu pa e organisashon...

E trabou ku durante dje último simannan tantu Feco komo Giovanni a hasi a fruta ayera nochi na momentu ku e organisashon a presentá 7 brandingpartner...

Great pa tuma nota kon empresanan lokal ta demostrá nan sosten na e evento musikal di mas grandi di Kòrsou i te hasta por bisa di Karibe...

Na unda bo ta haña partisipashon di mas ku 400 músiko kompitiendo den un festival di kompositor?...

Anto loke ta mas importante ta presentando muzik riba nivel...

Papiando di muzik, tin un problema serio pa algun banda...

E músikonan venezolano ku tin kustumber di bin reforsá nos bandanan lokal, gran parti ta pegá na Venezuela ainda...

E desishon di Gobièrnu di Republica Bolivariana de Venezuela pa sera frontera tin su influensia te hasta den Festival di Tumba...

Uniko solushon ku bandanan lo tin si nan logra pa manda e músikonan por ehèmpel Colombia òf Panama i laga nan bin Kòrsou...

Segun ma komprondé te ku aworakí e frontera ta sera te ku djabièrnè awor, loke te ainda ta kai nèt bon pa e supladónan bin Kòrsou...

Despues dje wikènt aki si ta problema grandi...

Papiando di músikonan...

Ma tende di un kantante ku ta parse lo bai Festival di Tumba ku un otro banda...

E ta hasiendo esaki sin a pone su banda ku el a partisipá e último añanan na altura...

Awó e kos ta bin, e lider dje banda ku e tin kustumber di presentá kuné den Tumba lo mester a indiká ku si e no partisipá ke banda, no tin biahe pa Zomerkarnaval ku su banda pa e kantante ei...

Djadumingu awor tin inskripshon di Tumba, e kantante tin algun dia ainda pa tuma su desishon...

E petishon di Sr. Omar van der Dijs pa empresanan duna nan sosten na Festival di Tumba a risibí oido...

AMAK tabatin 5 brandingpartner te ku ayera i ta durante di dia Refineria Isla i mas despues di pitu Curoil tambe a djòin komo partner...

Awor AMAK por bai konsentrá su mes pa produsí huntu ku Massive Productions e di 48 edishon di Festival di Tumba ...

Ma tuma nota ku Zjangilae no a pèrdè tempu ku e asuntu di presentashon di Buleria durante di nan Jump In...

Nan a logra pa kontratá Q-Sign pa presentá durante di nan jump in, konosí komo e jump in di Post...

Keda pendiente pa un anunsio di ‘DEN E BEMBE’ pa djabièrnè awor...

Nos ta trahando riba un proyekto ku algun kolega pa presentá algu ku sigur lo hala atenshon pa e wikènt aki...

Ma komprondé ku e organisashon CCGG, Curaçao Carnival Goes Global ta trahando riba algun konsepto nobo ku lo hasi e transmishon i tambe e sitio kaminda nan ta transmití e karnaval di Kòrsou pa mundu henter algu úniko ...

Bo mester sigui inová si bo ke pa públiko sigui asistí na bo sitio di transmishon i pa esnan ku ta na kas tambe sigui e marchanan di Karnaval ku plaser...

Bon nos tei move, tabata un plaser pa traha riba otro edishon di ‘DEN E BEMBE’ pa Karnaval 2018...