Un felis djaweps pa tur nos lektornan...

Awe 11 t’esun...

Mas banda a kuminsá ku ensayá, pero tòg tin hende ku ta bou dje impreshon ku e kantidat di partisipante pa Festival di Tumba e aña aki lo ta ménos...

Ami te ainda no ta mira ta fo’i unda nan ta saka e saber ei....

Segun mi e tumberonan tradishonal tur ta partisipando i te hasta ma haña e impreshon ku tin algun ku a wanta un ratu tei bèk...

Kitando djis un ratu for di Karnaval mi tin ku informá ku e siman ku ta bini aki tin un bolsa di artista ku ta tuma lugá na New York kaminda kompanianan grandi ta partisipá...

Durante dje ‘bolsa di artista’ aki ta ‘book’ presentashon di artistanan ku ta bin promové nan presentashonnan na e aktividat...

‘DEN E BEMBE’ a komprondé ku ta despues di e ‘bolsa’ aki ku nos lo tin chèns di risibí algun anunsio grandi pa loke ta trata presentashon di artistanan internashonal aki na Kòrsou...

EXTRA ta den rekta final ku preparashon di un proyekto ku pa mañan lo keda kompartí ku nos lektornan...

E mundu digital ta sigui desaroyá i EXTRA sigur no ta keda atras pa loke ta trata esaki...

Ta pendiente pa mañan nos kompartí esaki ku nos oyentenan...

‘DEN E BEMBE’ a komprondé ku e tim multidisiplinario ku ta bai dirigí Karnaval ta reuniendo praktikamente tur dia...

Ta fo’i mainta e tim ta topa i reuní riba diferente punto relashoná ku e aktividatnan di Karnaval i tambe e marchanan riba nan mes...

E bulamentu di kurá di un kantante di un banda popular a lanta basta stòf...

Awor ta resultá ku tin músikonan dje banda ku ora nan a tende dje notisia a rabia formal i no ta niun tiki kontentu ku loke e kantante aki a hasi...

Awe ta fecha dje reunion riba seru. Awe ta bira konosí ken t’esnan ku ta bai presentá Festival di Tumba 2018 via dje sistema ‘Pay Per View’...

Skibiendo esaki mi ta kòrda loke ku Giovanni Atalita a referí na dje durante di rueda di prensa di AMAK...

Parse ku tabatin reklamo den direkshon di AMAK pa loke ta trata e maestronan di seremonia pa Festival di Tumba...

AMAK ta 100 % para tras di su dos karanan di Festival di Tumba ku ta Rignald Maduro i Armando Huerta...

Giovanni a splika bon kla ku bo por ta maestro di seremonia pa kualke evento pero esei no ta nifiká ku bo por hasi Festival di Tumba...

Nan a purba na diferente okashon, pero tur biaha a bai bèk na nan duo dinámiko...

Ma komprondé ku tin masha ‘dranghek’ ku ta keda usá pa pone kantu di ruta di Karnaval ku ta den mal estado...

Tur aña ta pone un kantidat un banda i ta sigui traha ku loke tin i no ta buska manera pa drecha esakinan...

Si sigui asina, aki 1 òf 2 aña e kantidat di dranghek lo no yega mas pa kubri henter e ruta di Karnaval...

Tur hende ke e djòp pa pone i kita dranghek, pero niun hende no ta karga e responsabilidat di mantenshon di esakinan...

Shonnan nos tei move, mañan nos tei bek ku poder di Dios ku otro edishon di ‘DEN E BEMBE’...