Un felis djamars na tur nos lektornan...

Nos tei riba e djamars aki agradesido pa e tantísimo komentarionan positivo relashoná ku e transmishon di djadumingu atardi...

E siman aki ta siman di embahadornan di Karnaval...

E echo ku JAG a logra pa pone elekshon hubenil den Sambil anto esaki grátis pa públiko ta algu sigur di apresiá...

Riba Kleine Werf lo tin elekshon di Rei i Reina Tiner djabièrnè awor i djasabra lo ta Reina, Prens i Pancho grandi...

E elekshon pa embahadornan ta keda produsí pa Shurendi Pieternella i Incredible Decor...

Djadumingu nos a papia un ratu ku Niata Augusta i el a bisa nos ku tur kos ta kanando bon pa loke ta trata Festival di Tumba Hubenil...

Gruponan di Karnaval tambe ta den preparashon...

Ma pasa dos sede i ya e timnan ta trahando riba spit pa por terminá sigur e headpiecenan...

E ambiente na sedenan ta di trabou serio kombiná ku goso total...

Den tur grupo bo tin e hendenan ku ora nan yega nan ta pone ambiente i pone tur hende hari...

Tin hende ku ta traha den gruponan di trabou ta bisa bu ku e trahamentu ta yuda bu baha stress di tur dia...

Bo ta relahá bo mes hasiendo trabou di man...

Muzik i un bon beter no ta hasi falta...

Den tur e públiko di djadumingu durante di Inskripshon di Festival di Tumba 2018 nos no a mira Shon Dito...

E persona na kende Festival di Tumba a keda dediká no tabata presente...

Kùrmentu di vehíkulonan ku ta partisipá den e diferente marchanan di Karnaval ta tuma lugá kuminsando e wikènt aki...

Chèk e komunikado di Fundashon JAG den página di DEN E BEMBE pa dje forma ei abo lider ta na altura...

Otro añanan a traha un skedjel pa e gruponan bai kùr, e aña aki e impreshon ta ku ta habri, pues esun ku yega promé ta bai promé...

Keda pendiente pa e kampaña di Rei ken ta e Rei òf Reina di Tumba 2018 di bo EXTRA...

E kampaña ku durante dje último añanan a bin ta premia e ganadó dje kampaña ku un pakete kompletu pa 10 persona por disfrutá di Karnaval ta praktikamente kla pa por wòrdu lansá...

Lo bo tin chèns otro siman pa yena bo formulario i si bo rei ken ta sali Rei òf Reina di Tumba i su promé finalista bo ta gana un tremendo pakete...

Si tin mas ku 1 hende ku tin e kontesta korekto lo rifa e premio den esnan ku tin e kontesta korekto...

Ganadónan dje kampaña aki semper a keda sorprendí pa e kantidat di ko’i bebe i ko’i kome ku nan ta risibí...

‘DEN E BEMBE’ ta pendiente pa un otro proyekto ku nos ta bai lansa den Karnaval 2018, manera esaki ta kla nos lo kompartí esaki ku nos lektornan...

Ensayonan ta den ful swing, ayera nos fotógrafo i bon amigu, Rilley a pasa algun sede i kapta e músikonan ensayando...

Aworakí ainda bo no ta tende e tumba ku e sekshon di brass, ora bo yega banda di djabièrnè esaki ta kuminsá tuma lugá i e or’ei bo ta haña e impreshon kompletu di e tumba...

E sabor èkstra ku e brass ta pone na e tumba ta hasi esaki e chèri riba e bolo...

Tin banda ku a manda buska un brass kompletu, pues nan no ta usando niun músiko lokal, esaki simplemente pa evitá ku tin músiko ku tin ku bai ensayá ku otro banda i ora nan yega nan ta kansá...

Bon shonnan nos tei move, te mañan ku Dios ke !.