Un felis dia pa nos lektornan...

Ensayonan a sigui ayera nochi i mester bisa ku tin basta entusiasmo na algun sede di ensayo...

Tin algun bon tumba na kaminda i sin kaba di tende algun tumba ful harmá, ya tin hende ta bisando bo ku e tumba ta zona bon ...

Fundashon J.A.G. huntu ku gerensia di Sambil Shopping Mall a bishitá Minister Alcalá-Wallé ayera...

Minister ta sumamente kontentu ku Sambil a duna su aporte na Karnaval dor di hasi posibel ku djadumingu awor e elekshon di Reina, Prens i Pancho Hubenil ta keda organisá den nan ‘Foodcourt’ ...

Entrada pa e evento ta grátis...

Ya kuementu di kick a start pa loke ta trata e hendenan ku ta bai Festival di Tumba...

Un konosido makiyista a pidi pa kòrda make up na drechi pasó ta masha kámara HD tin pe kara no sali mane ‘Transformers’...

Otro ta pidi esnan ku ta bai den Red Carpet pa kòrda hunta e kokoti ku zeta di koko....

Wak pa bo no sali shinishi...

Abrenunsiaaaaa...

Espektativa ta haltu pa loke ta trata e Festival di Tumba dje aña aki...

Ayera AMAK a bai Aruba pa promové e evento aya i basá riba reakshon mester bisa ku ta basta rubiano ta pendiente pa bin Kòrsou...

E echo ku Buleria ta presentá djárason ta hasi posibel ku algun hende lo bin Kòrsou for di djárason i keda un kedá pa disfrutá dje final tambe...

Esaki sigur lo kontribuí na e spin off ekonómiko ku Festival di Tumba ta trese pa Kòrsou...

Branding partnernan di Festival di Tumba ta usando wowo di falki pa kontrolá tur loke a keda akordá den kontrakt ku AMAK keda biba...

Tin un di nan ku te hasta ta hasi uso di ‘spion’ pa hasi e kontròlnan...

E tim di relevo den Festival di Tumba ta na kaminda...

Basta kantante hóben partisipando e aña aki...

Damanan tambe ta bon representá ku 14 dama ku a inskribí pa partisipá...

Awe Digicel tin un evento na nan ofisina prinsipal...

Nan ta spònser ofisial dje elekshon di Reina, Prens i Pancho grandi...

Awe e partisipantenan ta keda ofisialmente presentá durante dje evento na Digicel...

Un tópiko kayente den e temporada aki di Karnaval ta e echo ku un medio di komunikashon a benta liña abiertamente riba presentadó di un otro medio di komunikashon...

Ora e otro media a tuma nota nan a pèrkurá pa mesora nan sera nan kurá di kas i tene shon den kurá serka nan...

Balorá bo trahadónan...

Pa transmishon di Tumba tambe tin emisoranan ku ta buskando hende kapasitá pa hasi esaki...

Ta bisto ku e aña aki tin algun medio ku ta suak pa loke ta trata personal pa kubri e eventonan prinsipal di Karnaval...

Ayera ami huntu ku un kolega tabata opservá kon bon Glenn ta animá durante dje programa ‘Rumba pa Tumba’ na televishon...

Glenn tin e feeling perfekto pa animá den temporada di Karnaval...

Su selekshon di tumba ta ‘on point’ loke ta hasi apart for di tur sobrá...

Ta manera el a bisa, ora e kuminsá ku su presentashon di piesanan di Tumba, sobrá mester drenta den stadion i sinta den tribuna wak wega tuma lugá....

Nos ta pendiente pa ‘Zongo’, Kòrsou tin hopi tumba bon pa zona pa animá kualke evento...

Awe tambe ta fecha ku Fundashon di Karnaval di Bándabou ta bai kompartí e último detayenan di nan temporada di Karnaval na prensa awe...

Nos ta pendiente di esaki tambe pa kompartí ku nos lektornan...

Un preokupashon ku sigur tin na Bándabou ta e echo ku nan a drecha Kaya Prospero Rojer...

A pone asera loke ta hasi e kaya mas smal i loke ta pone ku e públiko ku normal ta sinta kantu di kaya praktikamente na final dje marcha di karnaval di Bándabou lo bira ménos, pasó no tin lugá na drechi pa para...

Bon nos tei move, un felis dia pa bo, mañan nos tei bèk pa kompartí mas di Karnaval ku bo...