Un felis djaweps pa tur nos lektornan...

Ayera nochi nos fotógrafo a bishitá dos ensayo, esun di Vega na Skèrpènè i Gentz na Saliña...

Partisipashon na Festival di Tumba ta un kos serio i ta di apresiá ora bo mira e seriedat ku músikonan ta prepará nan mes pa e festival...

Nos a tuma nota ku tin un agrupashon musikal ku a disidí ku e no ta warda mas riba desishon di Venezuela si nan ta habri e espasio aéreo mas, nan a bai Aruba i buska trompetista i trombonista pa kompañá nan banda...

Tin sigur un banda ku a kontratá un supladó for di Colombia, esaki pa evitá doló di kabes ku e otronan ku lo tin ku bini for di Venezuela...

Ma tuma nota den prensa ulandes ku Venezuela lo mester a ekstendé e blokeo di biahe di venezolanonan komo turista pa e islanan ABC...

Si esaki di bèrdat ta e kaso, tin algun banda ku mester tuma medida urgentemente...

Ayera e partisipantenan pa Elekshon di Reina, Prens i Pancho grandi a keda presentá ofisialmente na prensa durante di un evento na e ofisina prinsipal di Digicel ...

Digicel ta e spònser prinsipal di e elekshon di embahadornan grandi i a demostrá ku nan ta apoyá e elekshon den gran forma...

Great pa mira kon spònsernan ta tuma un evento di e kalènder di Karnaval i duna esaki nan sosten kompletu...

Tin un total di 7 kandidata pa elekshon di Reina, miéntras ku pa Prens i Pancho tin 5 duo partisipando...

Elekshon di Embahadornan di Karnaval ta tuma lugá e wikènt ku ta na kaminda aki...

Awe AMAK tin otro rueda di prensa en konekshon ku Festival di Tumba 2018...

Kiko ta e puntonan ku AMAK lo ke kompartí awe no ta konosí ainda...

Kitando djis un ratu for di Karnaval...

Curaçao North Sea Jazz a anunsiá di algun artista ku lo ta presentando den e di 8 edishon di CNSJ Festival aki na Kòrsou...

E nòmbernan ku a keda menshoná mester ser konsiderá esnan chikí pa mi...

E nòmbernan grandi mes ta na kaminda, ki dia ta anunsiá nan ta kestion di sinta trankil i warda...

Ata na Aruba ayera a sali e anunsio ku awe nan lo anunsiá ken ta e artistanan ku lo presentá durante di Aruba Summer Music Festival ku lo tuma lugá den e wikènt di 29 i 30 di yüni 2018...

Na Bándabou FKBB a tene rueda di prensa pa duna detayenan relashoná ku Karnaval...

Huntu ku Polis nan a hasi menshon dje rekonstrukshon di asera ku a tuma lugá na Barber na altura di sede di FKBB...

Antes por a parker outo riba e asera, pero awor ku a pone klenku esaki ta keda prohibí...

A hasi posibel ku por parker outo riba e vèlt di futbòl na Barber...

Gentz ta ensayando den Spoonz. Ayera nochi ‘DEN E BEMBE’ a dròp in i a topa Chony Nahr den ensayo...

Gentz ta presentá riba e promé anochi di Festival di Tumba, djaluna 22 di yanüari próksimo...

E formashon musikal ‘Hype’ huntu ku Kleine Man a produsí un roadfire titulá ‘Broma ku bo pluma’...

Hype tambe ta den Festival di Tumba...

Nan lo kompañá Clinton Hato i Jill Frans...

Hype ta presentando riba djamars anochi, e di dos di Festival di Tumba 2018....

Bon shonnan nos tei move, mañan nos lo kompartí mas informashon...