KRALENDIJK – Aries Felix, propietario di Pachi’s Place, durante e programa Aktualidat na Bonaire.TV, a sigurá ku tin makamba aktualmente den negoshi di prostitushon. Nan ta hasié den forma klandestino.

Felix: “Tempu ku tabatin hopi diskushon riba Pachi’s Place despues di 10-10-10, tabatin un par di empresario hulandes tabata kla pa drenta den e brènch ei. Nan no por a yega dje leu ei pa hasié legal, pero e ta moviendo klandestinamente i si ta nesesario nan ke puntrá mi, mi ta dispuesto. Mi tin’é kla ku e ta sosodiendo aktualmente. Tin bastante hende ta hasi’é i den nan tin makamba tambe, pasobra nunka e hendenan aki a haña un servisio di nan paisano kompará ku un kolombiana.”

Tin vários di nan kasá, pero tin vários di nan ku ta trese e damanan aki tambe pa servisio i despues nan ta bai. Felix a bisa e sa presis unda e sitionan ei ta i sa tambe presis ken ta hasié.

Awor pa Pachi’s Place ta será, nan no mester bai niun kaminda, pasobra nan ta manda buska e damanan aki. Por bisa parsialmente ku ta importando prostitushon for di Hulanda. Di otro banda por bisa ku e hulandes ta importá e damanan pa bin duna nan servisio for di Colombia i despues di tantu dia nan ta bai bèk. Pero nan ta permití e dama pa duna servisio na otro tambe, segun Felix.

Felix a sigurá ku aktualmente tin shete dama ku a traha na Pachi’s Place na Boneiru. E ta fásil pa detektá, pero mester ke traha e trabou. Pero no ke bai traha e trabou riba un kolombiana kaminda bo tin bo paisanonan ku ta bin hasi mesun trabou aki nan. Anto ei nan ta bini e impotensia di KMar.