WILLEMSTAD.- Temporada di Karnaval 2020 a kuminsá i EXTRA ta bai selebrá e 50 aniversario di Karnaval i Festival di Tumba den grandi ku su siguidónan.
Tantu e lektornan di korant EXTRA komo esnan ku a sigui EXTRA riba su diferente plataformanan digital lo bai gosa di un temporada di Karnaval tur afó ku EXTRA.
Ya den wikènt ku ta tras di lomba nos a transmití e konsierto di ‘Carnival Village’ i e reakshon tabata sublime.
Awor nos ta pendiente pa e tradishonal transmishon di Inskripshon di Festival Tumba i un biaha mas nos ta preparando pa ofresé e ‘Extravidentenan’ un produkshon úniko ku e ambiente i karga ku informashon manera bo a kustumbrá kuné di EXTRA.
Tico Balentien, Sue-Ellen Cijntje i Luis Curiel lo tei komo anfitrion pa e edishon number 50 di Festival di Tumba. Komo kolega invitá nos lo tin Tony Castro ku lo bai duna henter e inskripshon di Festival di Tumba un sous èkstra!.
Huntu ku e produkshon di Inskripshon di Festival di Tumba EXTRA ta pendiente tambe pa algun proyekto mas ku segun dianan ta yegando serka lo bo keda informá di kada un di nan.
Keda pendiente tambe pa nos tradishonal rifa di ‘Ken ta Rei òf Reina di Tumba 2020’, ta pendiente tambe pa un otro rifa ku lo keda anunsiá e siman aki mes kaminda bo por asistí komo VIP na Festival di Tumba 2020.
Kòrsou tei selebrá su di 50 edishon di Karnaval i Festival Tumba i p’esaki EXTRA tei pa su kuenta!.