Kerido lektor, felis dia p’abo i danki pa lesa e kolumna aki. Awe nos tei bèk ku bo kolumna di futbòl. Anto ku diferente informashon kayente kayente.

Kayente

Porfin wikènt tras di lomba FFK por a organisá su selebrashon di 100 aña futbòl na Kòrsou. E malditu COVID-19 a stroba e aktividat aki di tuma lugá na algun okashon, manera e presidente di e aktual direktiva mes a duna di konosé den su disertashon djadumingu anochi na e seremonia ofisial ku a tuma lugá na Dreams Hotèl.

Kayente

E wikènt di selebrashon di futbòl a resultá unu masha interesante. Ku entre otro weganan pa kopa ABCS ku ta un torneo ku FFK a pone riba pia den añanan tras lomba i ku semper a brinda e públiko di Kòrsou un chèns pa mira nos selekshon nashonal den akshon kontra di Aruba, Bonaire i Sürnam. Tambe djasabra  anochi  tabatin rekonosementu na dirigentenan den nos mundu di futbòl na Kòrsou i pa finalmente djadumingu klousura e wikènt ku tres aktividat. Atardi tabatin homenahe na e 100 mihó hungadónan ku ya a keda publiká algun luna pasá, despues a sigui e wega final di e torneo kaminda Kòrsou a gana di Boneiru 1-0. Pa mas anochi kulminá aya na Dreams Hotèl ku e nochi di gala. Un nochi di gala ku no por a konta ku masha invitado pa motibu di e medidanan relashoná ku COVID-19. Loke a hasi hopi doló na hopi miembro.

Kayente

Bo ta sakrifiká bo mes, bo kas i bo famia p’abo sirbi futbòl tantu aña i finalmente esun dia ku ta selebrá e 100 aña di e deporte bo tin ku keda kas i imaginá kon esaki ta tumando lugá. Un kos hopi fèrfelu. Mas fèrfelu ta ku hendenan ku no tin ni arte ni parte den e mundu di futbòl si ta haña akseso na e selebrashon di e 100 aña di futbòl. Bida ratu ratu porta kruel “unfair”.

Kayente

Ata dado momento nos a sinti falta di presensia di algun dirigente di primera ora di nos futbòl pa último añanan i mesora a puntra na unda tal i tal persona a keda. E ora ei nos a bin komprondé ku Stanley Coffy ta sintiendo kebrante di salú, loke nos ta haña ta di lamentá i ta dese’é pronto rekuperashon. Tambe nos a puntra pa Jean Francisca i akinan si nos a haña otro kontesta.

Kayente

E “no-show” di parti Jean Francisca tin di aber ku invitashon ku no a kana na satisfakshon di e èks presidente di futbòl pa último 20 añanan. Aparentemente Jean no a keda kontentu ku dirigentenan internashonal ku ta na Kòrsou riba invitashon di FFK ta yam’é i puntr’é kiko ta pasando paso e no ta presente. Siendo ku e ta vise presidente di CFU. Esta baina no!

Kayente

Otro kos ku tambe a trese malkontentu ta e presentashon di e buki di historia di 100 aña di futbòl skirbí pa dr. Valdemar Marcha. Akinan hopi ta esnan ligá ku e ekipo di Jong Colombia ku a ekspresá ku e úniko ekipo di Kòrsou ku a bira kampeon di CONCACAF, anto na 3 okashon, no ta keda menshoná den e buki aki. Hòmbu!

Kayente

Sinseramente nos ta kere ku no mester tira e kulpa riba señor Marcha. Ora ku bo ta skirbi asina ta loke ku bo haña na kompilashon i tambe for di bo fuentenan, esei ta subi riba papel. Ta p’esei mas amplio bo grupo di informashon ta, mas grandi bo ángulo di informashon ta.

Kayente