WILLEMSTAD.- E siman aki e promé single di e formashon DXBT a keda lansá.
E boyband DXBT ta kai bou di maneho di Decoded, un plataforma internashonal di músika, ku base na Kòrsou.  DXBT ta konta ku  karanan konosí Denzel, Xechell, Bjorne i Terren- i ta kontené e promé lèter di e nòmber di kada integrante. Nan ta e artistanan di mas hóben den e portofolio di Decoded.
Manera ya antisipá, e grupo lo a lansa nan promé kansion titulá ‘Mi no por imaginá’. E kansion ta konta di un amor hubenil. E amor aki ta bin bèk den transkurso di henter e piesa i ta reflehá esaki den diferente manera.
Mester bisa ku e kansion ta keda kompañá pa un video clip, ku entretantu ya tin riba 19,000 views riba YouTube den su promé 2 dianan. Den e clip, Denzel ta wòrdu buská na skol dor di su tata i ta einan e historia di e amor hubenil ta kuminsá. Durante di e clip ta tuma nota di vários detaye hubenil, e.o deporte, wega di playstation, esena na skol i mas. Un produkshon netamente pa e teener.
Tur integrante di DXBT ta figurá den e kansion i den e clip. E kansion ya kaba a kuminsá zona na radioemisoranan lokal i ta halando hopi atenshon den hubentut eskolar. Hóbennan por sigui DXBT riba Snap Chat DXBT.
Resientemente tambe Decoded a lansa, e videoclip nobo di ORI ku ya kaba a generá un 30,000 views den su promé siman. Dia 29 di mei próksimo ta pendiente pa lansa un kansion i videoclip nobo di e artista urban Jaido, titulá ‘Speed’. Sigui Decoded via di nan YouTube Channel:  Decoded Official òf nan página di Facebook.