WILLEMSTAD.- Deporte di karting ta hañando forma bek aki na Kòrsou. Curaçao International Karting Club a keda lantá ofisialmente dia 1e di yüni 2021 ku na kabes Michael Marugg. Den korto tempu di eksistensia e organisashon a yega na un total di 40 karts, repartí riba diferente kategoria kuminsando for di muchanan di 6 aña te ku adultonan di 60 aña. Segun Marugg ta duna di konosé, e direktiva di CIKC ta trahando duru pa den e próksimo 12 lunanan por konstruí su propio pista p’asina por tene kompetensianan internashonal.

E deporte di karting tabata masha popular den añanan 80 i 90 aki na Kòrsou. Despues a sigui un periodo largu durante kua no tabatin masha aktividat debí ku e pista ku tabata usa na “Shut” no tabata apropiá mas. Despues di hopi aña, espesialmente esnan ku tabata praktiká e deporte den pasado a disidí pa reaktivá esaki i a lanta e organisashon ariba menshoná.

E meta prinsipal di e organisashon ta pa engrandesé e deporte mediante kreashon di oportunidat pa espesialmente esnan mas hóben por partisipá i tambe konstrukshon di un pista nashonal. Kòrsou a demonstrá di tin talento riba tur tereno di deporte i e federashon ta kombensí ku karting no ta un eksepshon.
Mas aleu nan ta hasi menshon dje echo ku tur koredó di Formula Unu i otro deportenan di motor a kuminsá for di hóben koriendo karting. Lewis Hamilton, e aktual kampeon mundial di F1, meskos tambe Max Verstappen, a kuminsá ku karting.

E aña aki tabatin diferente aktividat di karting i debí ku no tin un pista ainda, a usa área di stashoná di Santa Barbara, “E-zone”  na Hato, Waaigat i tambe parkeerplaats na rotònde di SDK. Apart di e karedanan lokal, tabatin delegashonnan ku a kompetí na Colombia i tambe Panama. Riba 8 & 9 di Òktober tin un total di 20 karters ku lo bai partisipá den kompetensia na Aruba.

Di parti di Curaçao International Karting Club ta bai un gradisimentu na Curinde, CTB, mando Polisial i tambe FDDK pa nan koperashon durante di e lunanan pa a fasilitá e lokalidatnan pa por a praktiká e deporte.