GINEBRA, SUISA, AFP.- Desasternan di klima a multipliká ku sinku den e último 50 añanan i kousa hopi daño, ounke sistemanan di alerta nobo a yuda redusí e kantidat di mortonan segun un informe di Nashon Uní publiká djárason.
Organisashon meteorológiko Mundial (OMM) di Nashon Uní a studia frekuensia, mortalidat i pèrdidanan ekonómiko kousa pa desasternan entre 1970 i 2019.
“E kantidat di fenómenonan ekstremo a oumentá. Debí na kambio di klima mas frekuente i severo den gran parti di mundu”, segun komunikado di e sekretario general di OMMS, Petteri Taalas.
A registrá mas di 11.000 desaster relashoná ku fenómenonan ekstremo rònt mundu desde 1970. Funshonarionan ta kalkulá ku e desasternan aki a kobra bida di mas di dos mion persona i laga 3.64 miar di daño material.
E organisashon a bisa ku 91% di tur morto a sosodé den paisnan den desaroyo. Sekura tabata un di e fenómenonan di mas grave responsabel pa morto di 650.000 persona durante e periodo.
