NEW YORK, MERKA.- ‘Despacito’ e mega hit na spañó di e puertorikeñonan Luis Fonsi i Daddy Yankee a kombertí ayera, djabièrnè komo e video di mas mira den historia di YouTube superando 2.995 mion di ‘views’.
El a laga atras ‘See You Again’ di e rapper merikano, Wiz Khalifa i Chalrie Put, ku tabatin 2.993 mion ‘views’.
‘Kibra e rekòr ta algu inkreibel, mi ta felis i lo sigui inspirá otronan pa hasi meskos, asina Daddy Yankee a deklará durante di un entrevista di e revista ‘Billboard’.
‘Mi ta rekonosé e influensia ku e plataforma di YouTube tin. E industria di músika a kambia, e reglanan di músika a kambia, Yankee a añadí.
Den luna di yüli a deklará ‘Despacito’ komo e tema mas skucha via di ‘streaming’ den historia, ku mas di 4.600 mion ‘plays’ tantu den su vershon original komo e remix riba plataformanan manera YouTube i Spotify.
Riba e ranking di ‘streaming’ el a surpasá ‘Sorry’ di Bieber, ku mas o ménos mei di yüli tabatin 4.380 mion views, esaki a keda konfirmá pa Justin Bieber mes.
Fuera di esaki ‘Despacito’ durante di 12 siman a liderá e lista di Billboard Hot 100, i a resultá e promé kansion na spañó ku a alkansá puesto #1 for di despues ku ‘Macarena’ a logra esaki na 1996.