WILLEMSTAD.- E reunion konvoká pa AGKK ku lider di gruponan di Karnaval ayera nochi a resultá un anochi kaminda informashon a keda kompartí ku lidernan di grupo i a diskutí ampliamente riba ‘Despedida di Parada di Tiner’. Polis, Brantwer i e sekshon di ‘Milieu’ di GMN a duna informashon na esnan presente. Un dje puntonan ku sigur a resultá un diskushon riba e anochi di informashon ta na momentu ku gruponan di ‘Parada di Tiner’ a duna di konosé ku nan no ta mir’é pa organisá un despedida pa Parada di Tiner den 2018, debí ku gruponan a risibí e informashon demasiado lat i ku aworakí ta bira imposibel pa gruponan mes por kubri e gastunan relashoná ku esaki. Pa di promé a reklamá ku ta ayera numa a risibí e informashon ofisialmente i a pidi e fundashon organisadó di Karnaval 2018, JAG pa nan pone pretu riba blanku ku nan lo pèrkurá pa tin dj disponibel pa e marcha i pa nan kubri e gastunan èkstra i konsumo pa e marcha. Un lider di un dje gruponan a te hasta trese dilanti ku pa nan partisipá na e marcha di despedida di tiner ku nan lo tin ku laga e partisipashon na Karnaval di Bándabou aki pa por hasi esaki, pero ku ta un desishon inhustu esaki lo ta. JAG di su banda ta lamentá e situashon ku a presentá indikando ku di nan parti nan a informá AGKK adelantá ku nan ta trahando riba e plan aki, nan a presentá e plan na ‘stakeholders’ di Karnaval i ku tur detaye tabata kla pa por a organisá e marcha di despedida. Juni Aniceta, presidente di JAG no a informá ayera nochi ki nan desishon ta, loke ta indiká ku mester keda pendiente pa wak si JAG lo aseptá e responsabilidat pa kubri tur gastu relashoná ku e despedida di Parada di Tiner. Tanten e marcha aki ta kologá na ‘un hilu’