LAS VEGAS, MERKA.- ‘All I Want for Christmas is You’ di e kantante Mariah Carey a logra di drenta e ‘Top Ten’ di e lista di éksitonan di Merka despues di 23 aña di su lansamentu, asina e revista Billboard a informá.
E kansion, lansá na 1994, a logra pa promé biaha yega na e di 9 lugá riba e lista i ta promé entrada di Carey riba e ‘Top Ten’ for di despues di ‘Obsessed’ ku na 2009 a alkansá puesto # 7.
Total, e kantante a logra di pone 28 kansion di dje den e ‘Top Ten’ di kansionnan mas eksitoso di Merka, algu ku solamente Madonna, The Beatles, Rihanna i Michael Jackson ta superá.
Segun Billboard, ‘All I want for Christmas is You’ ta e promé kansion ku ta drenta e ‘Top Ten’, despues di 23 aña di a wòrdu lansá, anto esaki e tin ku gradisí na ‘streaming’ di muzik.
E hazaña aki tin aun mas mérito, debí ku ta trata di un kansion navideño, pues ta algu ku masha poko ta keda logra ku nan ta subi na un puesto haltu riba e lista di éksito.