CARACAS, VENEZUELA, AFP.- Venezuela i Colombia ta habri nan frontera di tera i tambe ta kuminsá bèk ku buelonan komersial, suspendé pa 5 aña kaba, asina presidentenan di e dos paisnan Nicolás Maduro i Gustavo Petro a anunsiá den un desishon ku ta marka komienso di restablesé relashonnan bilateral, interumpí for di 2019.
Dia 26 di sèptèmber “nos lo habri konhuntamente e fronteranan entre Venezuela i Colombia. Ademas nos ta reanudá buelonan entre Bogotá, Caracas i Valencia Bogotá”, asina Maduro a bisa riba Twitter.
“Dia 26 di sèptèmber awor nos lo habri e fronteranan entre Colombia i Venezuela. Komo promé paso pa reanudá e konekshon aéreo i e transporte di karga entre nos paisnan. Nos ta konfirmá e kompromiso di gobièrnu pa restablesé e relashonnan di hermandat”, asina Petro tambe a Tuit.
Ámbos pais a kuminsá bek ku relashonnan formal djaluna 29 di ougùstùs ku e yamada na Caracas di embahador kolombiano Armando Benedetti meskos ku pa Bogotá di kansier venezolano Felix Plascencia.
E kompania di aviashon Avianca ku tabata kubri 50% di buelonan entre Caracas i Bogotá a suspendé su operashonnan pa i for di Venezuela na yüli 2017 indikando ku e ta hasié pa kuida seguridat pa ku e limitashonnan operativo.
