WILLEMSTAD- Moveshonnan farandulero pa e fin di aña aki ta mustra ku hopi hende lo ta kabes pa Aruba pa por habri nan aña den un ambiente ku tres agrupashon musikal super duru. Un ambiente ku lo tuma lugá den Renaissance Convention Centre na Playa.

E ambiente aki ta estilo di 2 kontra 1 pasobra e agrupashon musikal number 1 den su kategoria aki na Kòrsou i e banda mas gustá di Kòrsou na Aruba ku ta Gentz ta bai den un mano mano ku Buleria i D’-Licious tur dos di Aruba.

Un fiesta titan ku ta pone ku no por tin nada mas mihó pa por habri aña i drenta 2018 ku e bandanan aki.  Gentz ta bai ta super bon prepará i lo subi avion dia 31 pa regresá Kòrsou dia 1 di yanüari 2018 den oranan di atardi. Tur e tres agrupashon musikalnan aki tin nan fanatikada ku ta sostené nan tur ku tin.

Gerensia di Gentz lógiko no ta lanta bai Aruba ku músikonan so. E aña aki nan ta sòru pa e kasanan i òf partnernan tambe ta riba buelo pa asina e integrantenan por pasa kambio di aña huntu ku nan famia. I despues di tiru ta otro un tiru ku e kombinashon sin kompashon aki. Esaki ta e kombinashon ku ta paralisá tur otro kombinashon rònt Karibe Ulandes. Pues pa fanátikonan di bon ambiente prepará bo pa the party to beat.