ORANJESTAD.- Polis di Aruba ta informá ku djaweps anochi, riba e kaminda di Noord pa Playa, deskonosínan a atraká un polis na sivil. Dos persona a pone arma di kandela riba e polis. E polis a logra rekonosé un di e atrakadónan. E atrakadónan a hui den un outo Hyundai i10 bai direkshon Playa. E polis a purba siguinan, pero no a logra. Riba e kaminda di Shaba pa Tanki Flip a pèrdè nan for di bista debí na e tráfiko.

Relashoná ku esaki, awe mardugá outoridatnan a hasi entradanan hudisial na diferente kas. A bai na un kas na Montserat i a detené 4 sospechoso, a konfiská dos arma di kandela i un bulletproof vest. Tambe a bai na un kas na Boroncana kaminda a konfiská un arma di kandela mas. Polis ta indiká ku e investigashon ta sigui.