WILLEMSTAD.- Manera ta konosí, djasabra tras di lomba tabata dia di e tan komentá di dos edishon di Jazz Meets Cultures!
Tabata un anochi sumamente eksitoso, unda ku un i tur a disfrutá di un show musikal di kita sombré; un show ku manera organisashon a bisa, a kuminsá eksaktamente 8’or di anochi i a konta ku presentashon di 20 di nos artistanan lokal.
Jazz Meets Cultures Foundation ta gradisí tur spònser, kendenan a hasi e evento aki posibel: Aqualectra, Curoil, Licores Maduro, CINEX, TeleCuraçao / CARIFLIX, CTB, Kortijn Ijs i Massive.
Mas ku klaro ta yama un danki tambe na tur kantante, músikonan spesialmente na Dennis Aalse & Big Band ku a kompañá tur nos artistanan, bailadónan, boluntarionan, prensa i mas ku klaro na e públiko ku a asistí na gran eskala.
Manera a bisa for di un prinsipio despues di a warda 7 aña pa su di dos edishon, ‘Jazz Meets Cultures’ lo keda un evento anual riba e promé djasabra di yüni, pues reservá for di awor djasabra 1e di yüni 2019 pa e di tres edishon di Jazz Meets Cultures.