WILLEMSTAD.- Djasabra awor, 16 di novèmber 2019 e di dos edishon di ‘Biba Willemstad’ ta tuma lugá den Punda di 4 or di atardi pa 10 or di anochi. Aña pasá e promé edishon a tuma lugá den sentro di siudat ku e meta pa revitalisá Willemstad.
E motibu pakiko ta organisá Biba Willemstad, ta pa a base di goso, dibertishon i alegria, krea interakshon, kombibensia i koheshon entre nos hendenan lokal i e turista ku ta bishitá nos isla. E evento ta ser organisá den kuadro di Nation Building, Herensia Mundial riba lista di Unesco, Ekonomia Oraño i Futuro di Trabou. Komo adorno riba e bolo, nos ta konta djasabra próksimo ku presensia di e barku krusero Caribbean Princess, ku bastante turista na bordo.
Programa i orario
Kada parke lo tin atrakshon spesial, manera entre otro; riba Wilhelminaplein lo tin kanto i baile for di 4 or di atardi. Sinterklaas i su 50 Pietnan ku ta yega e dia ei mainta lo terminá su rekorido riba Wilhelminaplein pa 6 or di atardi. Despues di nan presentashon, Dolce Band lo deleitá un i tur ku su último hitnan i na final di anochi nos ta terminá ku un grandioso show di vürwèrk.
Riba Gomezplein ta start 4 or ku eksposishon di arte i kultura di nos artistanan lokal. Tambe kos di boka dushi. Pa 7 or di anochi lo inisiá e show di moda mas grandi ku hamas a ser organisá den Punda. Shete pakus prestigioso, entre nan Penha, Tommy Hilfiger, Boutique Emilia, Meow stores, Changes, Athlete’ Feet i Victoria Secret, lo eksponé huntu ku nan modelonan e trahenan di mas bunita pa fin di aña. Tur esaki interkambiá ku aktuashon di Excel Arts Academy i Rosa Tatuada.
Den Bahia di Santa Ana lo tin un desfile di Yatenan bunita entre 5 or i 6 or di atardi i despues Gino and Friends ta deleitá tur presente riba Handelskadete te ku 10 or di anochi ku nan músika varia manera nos a kustumbrá.
Riba Plasa Jojo Correa lo eksponé tur tipo di aparato, teknologia i kreashonnan pa futuro. Manera entre otro outonan remote i elektróniko, drones, goggles ku imágennan virtual i hopi mas. Tur esaki interkambiá ku músika di DJ Robertico i Titanium Brassband.
Adaptashon di tráfiko
Ta supliká Públiko pa tuma bon nota pa kambio di tráfiko. Pa garantisá seguridat e kayanan di Breedestraat i Handelskade lo ta sera pa outomobilista durante di e aktividat.
Un danki spesial ta bai na Ofisina di Turismo i Curaçao Ports Authority pa koperá ku Nos Pais Television pa hasi e aktividat aki posibel. Tin algu na smak di tur hende. Ta p’esei un i tur ta keda kordialmente invitá pa bin disfrutá huntu ku henter famia kompletamente grátis. Bini ku bo stul i sinta rilèks na kua parti ku bo kièr i pasa un atardi bai sera anochi, yena ku alegria i dibertishon. Ban rebibá nos Sentro di Siudat huntu djasabra awor.