Dia 28 di desèmber den Festival Center… Binti Ocho Events ta presentá ‘Desire 2023’

Farándula

WILLEMSTAD. – Drenta den e mundu fasinante di Binti Ocho Events, un kaminda fiesta nunka ta kaba, e eksperensia i vibrashon no por wòrdu igualá. Binti Ocho Events ta un organisashon ku a keda lantá separá i ku a originá for di Key Caribe. Key Caribe a organisá su promé evento, e konsierto di Burna Boy, dia 28 di òktober 2022. Djei a sigui e festival Sun Splash, riba dianan 2 i 3 di yüni 2023, ku a konta ku partisipashon di diferente artista internashonal. Tumando na konsiderashon ku Key Caribe su negoshi prinsipal ta benta di propiedat a opta pa krea un organisashon diferente, Binti Ocho Events, pa supervisá i atendé tur e aktividatnan relashoná ku eventonan.

E vishon ta simpel: kompartí nos pashon pa e bon músika bibu. Esaki nos ta logra organisando festivalnan anual, konsierto i otro tipo di eventonan na Kòrsou. Nos ophetivo ta pa krea momentunan ku ta reuní un komunidat diverso pèrmitiendo nan pa selebrá e bunita di bida via di e poder di músika.

‘Binti Ocho Events: For di e raisnan isleño te ritmonan afrikano, kaminda kultura ta uni den selebrashon’.

Presentando DESIRE

Un eksperensia di fiesta inovadó ku lo debutá djabièrnè, 28 di desèmber 2023. Prepará bu pa un anochi inolvidabel tanten Desire 2023 ta okupá un lugá sentral, presentando algun artista europeo mas popular di aktualidat.

Pakiko ‘Desire’? Nos ta yegando otro fin di aña i nos ta antisipá un aña nobo i nos ta tuma nos propio resolushonnan.

Kada un di nos tin speransa i aspirashonnan personal pa e próksimo aña. Algun di nos ta buska felisidat, miéntras ku otronan ta aspirá éksito. E ta un bon momentu pa nos selebrá bida ku e influensia di bon músika, tanten nos ta spera di por kumpli ku nos deseonan pa un aña nobo.

Curaçao Festival Center lo keda kombertí den un sitio spesial. Pa aklará lo no hasi uso di tur e espasio di Curaçao Festival Center, esaki ta nifiká ku e kapasidat pa e evento lo ta limitá. E produkshon baliabel aki ta primintí di ta un atraktivo ku lo mantené tur hende bailando henter anochi.

‘Desire’ lo kombiná e talento musikal di promé nivel ku un produkshon total aki na Kòrsou. ‘Desire’ ta aspirá di krusa fronteranan geográfiko i multikultural, pèrkurando pa konekshon den e idioma universal di músika. Uni ku nos pa selebrá e último siman di aña pa medio di e poder iresistibel di músika produsí pa e mesun mentenan kreativo ku a trese e konsierto di Burna Boy den 2022 i e ekipo vishonario tras dje festival di Caribbean Splash den yüni 2023.

Desire’s Headline

Jayh ku banda live

Jayh tin un orígen kultural diverso, Mama yu di Kòrsou i Tata di Morocco, el a desaroyá su habilidatnan musikal, inkluyendo tokando piano, keyboard i bass den e iglesia ku su mama ta bishita. Apart di esaki, Jayh ta un artista versátil ku ta destaká komo kantante i produktor musikal. Na 2011 el a kolaborá ku Partysquad den e single ‘Ik ga hard’ ku a okupá puesto number 8 riba e lista di e mihó Tòp 40 musikal di Hulanda. Tambe e tin vários éksito manera ‘Mijn Baby’ i ‘Volmaakt’.

Irsais ku banda live

E kantante Ir Sais a krea un meskla koutivadó di zouk antiano franses ku influensia latino den e género pop global, loke a duna komo resultado un estilo musikal eksepshonalmente kontagioso. Na 2018 su kansion ‘Dream Girl’ a optené amplio rekonosementu i su popularidat a oumentá den 2019 danki na un remix ku e strea urbano Rauw Alejandro. E remix a optené mas ku 100 mion ‘views’. E popularidat dje kansion a kontinuá den 2020 na momentu ku a produsí ‘Global Remix’ ku a konta ku kontribushon di Sean Paul i DaVido.

Dopebwoy

Dopebwoy ta un konosido rapper di Hulanda kende ku su ritmo i koronan pegahoso ta mantené tur hende bailando henter anochi. Su albùm ‘Nieuw Goud’ a alkansá puesto 36 di e Tòp 100 di albùmnan na Hulanda. Ku e kansion ‘Cartier’ ku Dopebwoy a lansa na yüni 2017 huntu ku Chivvi 3robi, el a logra su promé éksito ku e kansion a keda durante di 12 siman den Tòp 10. Durante añanan ku a sigui Dopebwoy a produsí i kolaborá ku diferente artista manera Jayh, Bizzey i Boef. Dopebwoy a funda su propio kas diskero bou dje nòmber Forever Lit Records, esaki den kolaborashon ku Warner Music Benelux. Bou di e kas diskero aki el a lansa ‘Hoog Seizoen’ ku a alkansá e di tres lugá riba Tòp 100 albùm di Hulanda.

Benta di karchi

Karchinan ta na benta na: Van der Tweel Zeelandia, Mensing’s Caminada, Ticketpoint i 24 uur uit de muur i riba e wèpsait di Binti Ocho Events (www.bintiocho.events)