WILLEMSTAD.- Despues di un temporada di preparashon pisá, Fundashon Kultural Banda Bou ta bai selebrá djadumingu awor, e di 21 aña di DIA DI BANDA BOU. Komo ku dia di Banda Bou no ta dia di un solo bario, lo tin aktividatnan festivo den kasi tur bario di Banda.

Na San Wilibrodu lo tin aktividat na kas di famia Jacobs i na vèlt di bala. Tera Kòrá, Ada Koenraad  i Frank Jamanika, Karké seka Nydelly Wllems. Riba kaminda di Fòntein rumbo Soto, ta haña Linchi Jamanika na Panekuk i mas abou, Lishe Leonard.

Na Asenshon lo tin Kas di Pal’i Maishi i Patron Snèk i mas abou den e asina yama kasnan di Fundashon seka Ella Pinedo lo tin ambiente. Den Barber lo tin aktividat na Parke Himno i Bandera, Kaya Chochoria, Renny Martina, Glenn Reina  i Rubina na Fourth of July Snack.

Kontinuando riba Kaminda Popo Rojer, kas di famia Rodney Coco, bai mas abou drenta na Rotònde Wiri pa bai Soto, kas di famia Bernadina, sali bèk i kontinuá riba Kaminda Popo Rojer, por lora bai Museo Vikto Bartholomeus na Rùst en Pat, despues Jenny Fluonia na Jan Dònker i na final di kaminda, Vitilia Jamanica.

Dobla rumbo pa Wespen seka Roy Gouverneur na Playa di Piskadó kaba bin pariba pasa seka Famia Mingeli-Granviel na Wakawa. Bo no por brua pasobra kualke hende di Banda Bou por Klara bo.

Basha bin Banda Bou bin selebrá e dia grandi, DIA DI BANDA BOU ku pueblo di Banda Bou. Tur aktividat ta kore entre 11.00 di mainta pa 11 ‘or di anochi.