WILLEMSTAD.- Dia di Bándabou ta dediká atenshon e aña akí na Karnaval di Kòrsou. Den e programa ku tin den Parke Himno i Bandera i e famoso Kaya Chochoria lo tin entre otro desfile di trahe di Karnaval di vários grupo.
Fundashon Karnaval di Bándabou lo ta presente pa informá públiko presente di nan programa di Karnaval pa otro aña ora nan ta kumpli 50 aña. E parti karnavalesko akí durante selebrashon di Dia di Bándabou ta en kooperashon ku JAG, Fundashon Karnaval di Bándabou i Fundashon Kultural Banda Bou.
Kaya Chochoria tin en aña aki un variedat di stènt kaminda ta bende grill, kuminda krioyo, artesania, paña, sapatu. Lo tin stènt ku informashon di aseguro tambe den e kaya akí. Pa esnan mas chikitu tin bouncer pa nan bula i gosa nan nan antoho. Tin stènt ku espasio kaminda ta pinta kara pa mucha tambe. Banda di esei tin stènt ku kos di kome i bebe ku mucha gusta manera friofrio, hotdog, suikerspin. Kos di boka dushi.
Na Barber ta selebrá Dia di Bándabou na Parke Himno i Bandera di 0 or di mainta te 22:45 di anochi. E programa pa e dia ta: 10:00 - 12:00 or Muzik di Gospel DJ; 12:00 - 14:00 or Muzik di DJ; 14:00 - 15:00 or Grupo di baile; 15:00 - 17:00 or Presentashon trahe Karnaval; 17.00 - 18:00 or DJ; 18.00 - 18:45 or Grupo di Aguinaldo Los Originales; 18:45 - 19:00 or DJ; 19.00 - 19:45 or Orirí; 19:45 - 20.00 or DJ; 20: 00 - 20:45 or Grupo di Tambú Braza Braza; 20:45 - 21.00 or DJ; 21.00 - 21:45 or Grupo di Aguinaldo Los Originales; 21:45 - 22:00 or DJ i 22:00 - 22:45 or ERA.