WILLEMSTAD.- Dia di Bandera lo yena e kayanan di Pietermaai ku koló ku un eksposishon di potrèt den airu liber ku muzik bibu.
Nos por ta orguyoso ku nos tin 107 nashonalidat bibando huntu aki na Kòrsou. E kolorido di Pietermaai riba e anochi di ‘Dia di Bandera’ ta haña dòbel nifikashon. E diversidat i e sentimentu di solidaridat den e sosiedat ta keda enfatisá durante e evento.
E anochi lo habri ku e inougurashon di un impreshonante eksposishon di ‘Proyekto Ç’ den e kayanan di e distrito di Pietermaai. Artístikamente e eksposishon tin komo ophetivo pa mustra e poder di diversidat, e solidaridat dje sosiedat di Kòrsou i e hende muhé.
‘Proyekto Ç’ a entrevistá 16 dama di diferente nashonalidat i nivel dje poblashon ku ta ilustrá e diversidat di Kòrsou. For di e entrevistanan a produsí algun deklarashon inspirativo ku despues a keda tradusí den potrètnan artístiko. E telanan ku e damanan a usa riba e potrètnan ta un símbolo di konekshon. E inisiativa aki tin komo ophetivo pa krea konsenshi riba e kombibensia na Kòrsou.
‘Proyekto Ç’ ta kuminsá pa 6’or di atardi riba un stage instalá na Ginger kaminda un kantidat di orado interesante lo presentá i e potrètnan lo keda desvelá. Ku bahada di solo e anochi ta kuminsá ku músika di un dj na Ginger i lo transformá i bira un programa di músika bibu na Mundo Bizarro, Miles Jazz Cafe i La Cantina del Patrón.
E evento ta grátis i Nieuwestraat lo ta sera pa tráfiko spesialmente pa e evento for di 4’or di atardi pa 11’or di anochi.
Pa mas informashon riba ‘Dia di Bandera’ den distrito di Pietermaai bo por sigui e página di Facebook òf Instagram di ‘Pietermaai District’ i ‘Project Ç’.