WILLEMSTAD.-  Mañan, djasabra dia 23 di yüni, Akademia di Músika Edgar Palm di Sentro Kultural Kòrsou (CCC na Emmastad), ta organisá un dia habrí pa públiko por sera konosí ku diferente instrumènt di bientu ku no ta masha popular. Por skucha i purba toka instrumentonan manera fagot, korno (hoorn), hobo. Interesadonan por inskribí pa kuminsá tuma lès den aña eskolar nobo.
Sentro Kultural Kòrsou den su afan pa sigui ofresé enseñansa musikal na nivel, a drenta un akuerdo ku músikonan lokal profeshonal ku a aserká CCC ku e bunita inisiativa aki.
E músikonan aki, ku ta forma parti di e Curaçao Wind Ensemble ku ta toka muzik klásiko, ke evitá ku tokamentu di e instrumèntnan aki lo bai pèrdí. Nan a aserká CCC i Prins Bernhard Cultuurfonds i a presentá e proyekto aki, ku a haña sosten mesora.
E Dia Habrí ta di 10’or di mainta pa 12’or di mèrdia den edifisio di Sentro Kultural Kòrsou na Koninginnelaan, pegá ku International School.
Interesante ta tambe ku un di e dosentenan di instrumènt di bientu a studia kanto klásiko. CCC ya pa algun aña kaba tin 2 dosente ku ta duna téknika di kanto popular ku ta Carlson Manuel (graduá na Codarts Rotterdam) i Lisette de Leeuw ku a studia kanto na Venezuela. Personanan interesá den siña kanto klásiko i ópera, tambe ta bon biní na e dia habri pa haña informashon tokante e téknika aki.
Banda di e instrumentonan menshoná, CCC su akademia di músika ta duna lès den otro instrumento di bientu tambe, manera dwarsfluit, blòkflùit, klarinèt, saksofon, trompèt i trombon. Pa mas informashon por yama 737-3510 i 737-3682.