WILLEMSTAD.- Djaluna dia 2 di yüli, Dia di Bandera, lo tin un grandioso Dia Krioyo den kurá di Museo di Tambú Shon Cola na Sabana Baka 31. Lo tin un total di sinku tayer, ku oportunidat pa siña algun tradishon interesante di ayera.
Konosé nos fòrnu di klenku ku demostrashon di tur su artefaktonan. Siña kon ta traha nos pan sera i purba ku keshi. Bo ke siña kon ta balia tambú? Kon ta kurti kueru, traha i rèk un barí? Bo ke sa kiko ta “banderita”?
Bishitá e tayernan i bin siña, rekordá, rebibá i disfrutá di bo kultura. Bin saboriá tambe dushi platonan krioyo di e kushina krioyo di Museo di Tambú Shon Cola. Bin disfrutá di Dia di Bandera den e dushi ambiente di kustumber na Museo di Tambú Shon Cola na Kaya Sabana Baka 31.
Atardi 6’or lo tin presentashon di tambú di e flamante Grupo Trankilo Klásiko ku kantikanan di Norma Gosepa, Freddy Gabriel, Bèno Martis i Epi Fidanque.
Fundashon Stripan ta warda bo for di 10’or mainta te 10’or anochi. Entrada ta grátis i partisipashon na tur tayer ta grátis.
Bin pariba na Kas di Tradishon Stripan bin fortifiká bo patriotismo. Bo ta bon biní i ta keda kordialmente invitá. Fundashon  Stripan na vanguardia di marka di Kòrsou.